Konfransda hər iki ölkənin yüksək səviyyəli diplomatı və onları müşaiət edən nümayəndə heyyəti iştirak edib. Azərbaycanın xarici işlər naziri Ceyhun Bayramov son 4 ay ərzində İran tərəfi ilə üç önəmli görüşün keçirilməsini və müxtəlif istiqamətlərdə danışıqların aparılmasını yüksək qiymətləndirib. Son 15 ildə isə mədəni, dini və siyasi mövzuda dostluq və əməkdaşlıq münasibətlərinin hər iki ölkələrin sərhədlərinin toxunulmazlığı çərçivəsində yüksək qorunmasını önəmli hesab edib.
"Bizim birgə keçirdiyimiz görüşdə müzakirələrimiz həm ikitərəfli münasibətlər həm, beynəlxalq(BMT), regional təşkilatlar çərçivəsində, yəni İslam Əməkdaşlıq təşkilatı, İqtisadi Əməkdaşlıq təşkilatı çərçivəsində oldu. Əməkdaşlığımızın ən vacib məqamlarından biri budur ki, İran İslam Respublikası ilə yalnız birtərəfli deyil, ikitərəfli, üç tərəfli və dördtərəfli platformalarda davam etdirilməsidir. Bu yalnız, Azərbaycan və Ermənistan üçün deyil, region ölkələrin inkişafına böyük təkan verəcək"
Birgə iki ölkə arasında iqtisadi əlaqələrin inkişaf etdirilməsi, azad olunmuş ərazilərin bərpasında İran tərəfindən çoxsaylı şirkətlərin iştirakı və İranın Astarasından Azərbaycan vasitəsilə Gürcüstana və Qara dəniz limanına nəqliyyat dəhlizinin işə salınması, Araz çayı üzərində Xudafərin, Qız qalası, Ordubad və Marazad kimi hidroqovşaqların, su elektrik stansiyaların tikintisi iki ölkə arasında gerçəkləşən lahiyələrdir. İranın xarici işlər naziri Hüseyn Əmir Abdullahian isə azərbaycanlı həmkarının fikirlərini dəstəkləyərək son dörd ay ərzində Nyu York, Aşqabad və İslamabadda tərəflər arasında aparılan danışıqların və nazirlər səviyyəsində reallaşdırılan dialoqların əhəmiyyətini yüksək qiymətləndirib. Nəqliyyat, enerji məsələri ilə yanaşı gələcəkdə hərbi, siyasi, kənd təsərrüfatı sahələrində də birgə əməkdaşlıq ediləcəyini qeyd edib.
"Bizim ölkə prezidenti ilə görüşümüz baş tutdu. İki ölkə arasında önəmli razılaşmalar oldu. Bir müddət əvvəl Azərbaycan öz ərazilərini azad etdi. Azərbaycanı təbrik edirik. İran İslam Respublikası Azərbaycanı dostluq və əməkdaşlıq baxımından ən yaxşı qonşusu hesab edir və bundan məmnundur. Biz istəyirik ki, regionda əməkdaşlığımız güclənsin və regiondankənar qüvvələr regiona müdaxilə etməsin"
Konfransda hər iki nazir 3+3 formatını son illərin regional təhlükəsiz və iqtisadi əməkdaşlığa xidmət edən böyükmiqyaslı layihə kimi dəyərləndirib. Layihə ciddi geosiyasi və geoiqtisadi əməkdaşlıq kəsb edir.
Mətbuat konfransında hər iki tərəfdən jurnalistlərin sualları cavablandırılıb.
Qeyd edək ki, İranın xarici işlər naziri Hüseyn Əmir Abdullahianın Azərbaycana ilk rəsmi səfəridir. Yanvardan etibarən hər iki ölkə nazirlər səviyyəsində danışıqların davam etdirilməsində maraqlıdır.

Günel İsayeva müxbir
Fotolar Baş redaktor Abil İslamındır