Azərbaycan xalqının mətin iradəli, qətiyyətli və böyük əməllər sahibi olan oğulları, igidləri çoxdur. Ancaq elələri var ki, həmişəlik adını tarixə həkk etdirir, əməli ilə xalqın dillər əzbəri olur, gənclərə nümunəvi şəxsiyyət kimi tanınır.
Bəli, bu gün həmin böyük oğullardan birinin doğum günüdür. Söhbət polad iradəli, Vətən Savaşının təməlini igidliyi və ölümü ilə qoyan Polad Həşimovdan gedir. O elə bir oğuldur ki, nə unudulur, nə də yoxluğu təsəlli olmur....
Əsgərlər çox nadir hallarda öz komandirlərini yadda saxlayırlar, o da çox nadir komandirlərdən idi.
Polad Həşimov Azərbaycan Ordusunun şərəfli general-mayoru idi. İstənilən əsgəri və hərbi yoldaşları onun haqqında həmişə xoş təəssüratda , inanılmaz yüksək fikirdədirlər. Elə bir general yoxdur ki, hər bir əsgəri onu çox sevsin, haqqında mərhəmət və sevgi dolu danışsın.
Əlbəttə ki, bunu general özü qazanıb, özü haqq edib əməlləri, mərdliyi ilə.
Polad İsrayıl oğlu Həşimov 2 yanvar 1975-ci ildə Qəbələ rayonunun Vəndam kəndində doğulub. Sonradan ailəsi ilə birlikdə Sumqayıt şəhərinə köçüb generalımız. 1992-ci ildə Sumqayıt şəhər 34 nömrəli orta məktəbi bitirən Polad Həşimov elə həmin il Heydər Əliyev adına Ali Hərbi Məktəbə daxil olub. Oranı 1995-ci ildə motoatıcı ixtisası üzrə bitirib. Həşimov 1992-ci ilin dekabr ayından etibarən Ağdam rayonunun Mərzili və Novruzlu kəndlərinin müdafiəsində, Füzuli rayonunun kəndlərinin azad edilməsi ilə nəticələnən uğurlu əməliyyatlarda, 702-ci motoatıcı briqadanın hazırlığında iştirak edib.
General Həşimov bununla yetinməyib. 1994-cü ildə Türkiyənin İstanbul şəhərində yerləşən “Tuzla Piyada Okulu”nda üç aylıq kurs keçərək hərbi təhsilini təkmilləşdirib. Həmin ilin fevral ayında Murovdağı silsiləsində Güzgü, Koroğlu dağı və Ömər yüksəkliklərinin alınması uğrunda vuruşan igid qəhrəmanımız 1995-2017-ci illər ərzində motoatıcı taqım komandiri vəzifəsindən hərbi hissənin komandiri vəzifəsinədək yüksəlməyə nail olub. 2014-cü ilin iyul ayında Azərbaycan Respublikası Silahlı Qüvvələrinin Hərbi Akademiyasına daxil olmuş, hərbi idarəetmə ixtisaslaşması üzrə magistr elmi-ixtisas dərəcəsi də almışdır Həşimov. 2017-ci ilin aprel ayından şəhid olduğu günədək hərbi birlik komandirinin birinci müavini – qərargah rəisi vəzifəsində xidmət edib.
Əlbəttə, sadalanan vəzifə və xidmətlər qələmdə rahat görünür, rahat da yazılır. Amma Polad Həşimov bunu illərini verərək, ömrünü həsr edərək qazanıb, nail olub.
Hər bir əsgərinə davranış və rəftardan öz böyük şəxsiyyətini qoruyub saxlayıb, həm də general kimi genaral olub.
Müharibədə döyüş də var, şəhidlik də. Ancaq vətənə görə döyüşmək, mübarizə mütləq lazımdır. Bu döyüşlər Silahlı Qüvvələrimizin bir daha öz üstünlüyünü təsdiq etdi. Bu əməliyyatın Milli Ordumuzun şanlı tarixində öz yeri olacaq. Amma etiraf edək ki, Polad kimi Vətənini sevən və ona ürəkdən xidmət edən oğulların sayəsində qələbəmiz böyük, ordumuz sarsılmazdır.
2-4 aprel 2016-cı ildə Talış kəndi yüksəklikləri uğrunda gedən döyüşlərdə birinci Ordu Korpusunun Qərargah rəisi olmuş Həşimov, döyüş zamanı yaralanır, ancaq düşmənə təslim olmur, əksinə 2 günlük mübarizədə zərbə endirir. Hazırda həmin istiqamətdəki postlardan birinin “Polad postu” adlanması da təsadüfi deyil. Məhz xidmətlərinə görə 25 iyun 2019-cu ildə Polad Həşimova general-mayor ali hərbi rütbəsi verilir, daha sonra Azərbaycan Silahlı Qüvvələrinin üçüncü Ordu Korpusunun Qərargah rəisi təyin olunur. Azərbaycan Respublikası Silahlı Qüvvələrinin general-mayoru Həşimov Polad İsrayıl oğlu 14 iyul 2020-ci ildə Tovuz rayonu istiqamətində baş verən şiddətli döyüşlər zamanı Ermənistan Silahlı Qüvvələrinin hücum cəhdinin qarşısını alarkən qəhrəmancasına şəhid olur. Bununla da Polad Həşimov İsmət Qayıbov və Məhəmməd Əsədovdan sonra 1988-ci ildən etibarən başlayan Qarabağ müharibəsində həlak olan üçüncü Azərbaycan generalı olur.14 iyul tarixində general-mayor Polad Həşimovun nəşi əvvəlcə doğulduğu Qəbələ rayonunun Vəndam kəndinə, sonra isə yaşadığı Sumqayıt şəhərinə gətirilərək 15 iyul tarixində II Fəxri Xiyabanda, polkovnik İlqar Mirzəyev ilə yanaşı dəfn olunur.
Ailəli idi. Üç övladı Vətənə yadigar qalıb.
Qısa bir qeyd edim ki, 2019-cu ildə redaksiyada çalışırdım. İstedadlı və çalışqan şagirdlər barədə yazı yazırdım. Təsadüfən Polad Həşimovun qızı Aybəniz Həşimova barədə də yazmalı oldum. Ancaq atasını bu qədər tanımadığımdan o vaxt övladı ilə bağlı danışıb məlumatları götürərkən danışdığım şəxsin, generalımızın böyüklüyündən xəbərsiz idim. Çox nəzakətli, həlim və mədəni bir şəxs kimi məlumatları verib sağollaşdı. Hətta iş yoldaşım da dəfələrlə dedi ki, onun uşağını tez yaz və jurnal tez çıxsın çox mədəni və gözəl insandır.
Bəli, mədəni və mərifətli şəxsiyyət, güclü hərbçi, mətin generalımızın övladı barədə jurnalı çıxdı da ünvana çatdı da. Hətta qızı yüksək balla həkimlik arzusunu da reallaşdırdı. Ancaq şəhid olanda biz bunun fərqində olduq ki, həmsöhbətimiz o gözəl insan idi.
Polad Həşimovun mükafatları da çoxdur saydıqca bitməz.
Polad Həşimov Azərbaycan Respublikası Prezidentinin 24 iyun 2003-cü il tarixli əmri ilə “Hərbi xidmətlərə görə” və 25 iyun 2009-cu il tarixli əmri ilə “Vətən uğrunda” medalları ilə, 24 iyun 2014-cü il tarixli əmri ilə “Vətənə xidmətə görə” III dərəcəli ordeni ilə, 2016-cı il Aprel döyüşlərində göstərdiyi xidmətlərə görə Azərbaycan Respublikası Prezidentinin 19 aprel 2016-cı il tarixli əmri ilə “Vətənə xidmətə görə” II dərəcəli ordeni ilə mükafatlandırılıb. Həmçinin Azərbaycan Respublikası Müdafiə Nazirinin müvafiq əmrləri ilə “Qüsursuz xidmətə görə” medalının hər üç dərəcəsi, “Azərbaycan Respublikası Silahlı Qüvvələrinin 10 illiyi (1991-2001)”, “Azərbaycan Respublikası Silahlı Qüvvələrinin 90 illiyi (1918-2008)”, “Azərbaycan Respublikası Silahlı Qüvvələrinin 95 illiyi (1918-2013)”, “Azərbaycan Respublikası Silahlı Qüvvələrinin 100 illiyi (1918-2018)” yubiley medalları, “Azərbaycan Respublikası Silahlı Qüvvələri Veteranı”, “Hərbi xidmətdə fərqlənməyə görə” III dərəcəli medalı ilə təltif olunub.
2020-ci ilin avqust ayında “Qanun” nəşriyyatı tərəfindən general-mayor haqqında “Polad generalımız” adlı kitab nəşr edilib. Qəbələ şəhərində Şəhidlər Xiyabanının yerləşdiyi küçəyə Polad Həşimovun adı verilib. Həmçinin 2020-ci ildə Dövlət Təhlükəsizliyi Xidmətinin Mədəniyyət Mərkəzi general Polad Həşimovun xatirəsinə “Paşam, hey” adlı mahnı və klip hazırlanıb. “Hədəf nəşrləri”nin “Xatirə ədəbiyyatı” silsiləsində “General Polad Həşimov xatirələrdə” kitabı nəşr edilib.
28 oktyabr 2020-ci ildə Türkiyə Respublikasının Bursa şəhər Osmanqazi rayonunun Dəmirtaş bölgəsində parka Polad Həşimovun adı verilib.
Azərbaycan Respublikası Prezidentinin 9 dekabr 2020-ci il tarixli Sərəncamı ilə general-mayor Polad Həşimov Azərbaycan Respublikasının ərazi bütövlüyünün bərpa edilməsində xüsusi xidmətlərinə və döyüş tapşırıqlarını yerinə yetirərkən göstərdiyi igidliyə görə ölümündən sonra “Azərbaycanın Milli Qəhrəmanı” fəxri adına da layiq görülüb.
AMEA Milli Azərbaycan Tarixi Muzeyinə general-mayor Polad Həşimovun şəxsi əşyaları təhvil verilib. Əşyalar P.Həşimovun həyat yoldaşı və oğlu tərəfindən muzeyə verilib. Həmin əşyalar ziyarətçilər tərəfindən ziyarət olunur və qorunub gələcək nəsillər üçün saxlanılır.
Bugün sənin doğum günün ey böyük general
Ruhun şad olsun!
VƏTƏN Polad kimi oğullarla bütövdür, güclüdür!!!