TAQ. az xəbər verir ki, 20 Yanvar faciəsinin 32-ci ildönümü ilə bağlı Azərbaycan Respublikasının İsveçrədəki səfirliyi tərəfindən anım tədbiri keçirilib. Tədbir çərçivəsində iştirakçılar İsveçrənin Lüsern şəhərinə səfər edib.
Səfər çərçivəsində tarix boyu müharibələrdə azadlıq və müstəqillik uğrunda canlarını fəda etmiş İsveçrə əsgərlərinin xatirəsinə həsr olunmuş İsveçrənin kədər və eyni zamanda qürur yaddaşını əks etdirən dünya şöhrətli “Can verən Aslan” tarixi abidəsinin üzərinə gül dəstəsi qoyularaq, müstəqilliyimizin bərpası uğrunda özlərini qurban vermiş şəhidlərimizin əziz xatirəsi bir dəqiqəlik sükutla yad edilib.
Sözügedən abidənin ziyarəti dünyada müstəqillik və azadlıq uğrunda həlak olmuş insanların xatirəsini yad etmək üçün yaranmış bir ənənədir. Tədbir çərçivəsində iştirakçılara 20 Yanvar faciəsi barədə məlumat verilib, şəhidlərimizin qəhrəmanlığından, xalqın mübarizə əzmindən bəhs edilib.
İsveçrədə koronovirus pandemiyası ilə bağlı həyata keçirilən yeni məhdudlaşdırıcı tədbirlər və bundan irəli gələn yeni sərt tələblər nəzərə alınaraq tədbirdə yalnız səfirliyin əməkdaşları və onların ailə üzvləri iştirak edib.
Günel İsayeva