Rusiya Xarkov və Xerson vilayətlərinə hücum edib: 9 nəfər ölüb
Rusiya Silahlı Qüvvələri Ukraynanın Xarkov və Xerson vilayətlərinə hücum edib, nəticədə son sutka ərzində 9 nəfər həlak olub, 47 nəfər yaralanıb.
Bu barədə Vilayət Hərbi administrasiyalarının rəhbərləri məlumat verib.
Xarkov Vilayət Hərbi Administrasiyasının rəhbəri Oleq Sinequbovun sözlərinə görə, son sutka ərzində Rusiya qoşunları raketlər, idarə olunan aviabombalar və müxtəlif tipli pilotsuz uçuş aparatları ilə Xarkova və vilayətin 17 yaşayış məntəqəsinə zərbələr endirib. Nəticədə üç nəfər həlak olub, 21 nəfər yaralanıb.
Xerson Vilayət Hərbi Administrasiyasının rəhbəri Aleksandr Prokudin Rusiya qoşunlarının Xerson vilayətinin yaşayış məntəqələrini də atəşə tutduğunu bildirib.
"Rusiyanın hücumu nəticəsində 6 nəfər həlak olub, daha 26 nəfər yaralanıb, xəsarət alanlardan biri uşaqdır", - o, "Telegram"da yazıb.
