Taq. az xəbər verir ki, bu gün Türkiyə Azərbaycan Qardaşlıq İctimai Birliyinin Suraxanı rayon təşkilatın sədr müavini, yazar Mənsurə Qaçayqızının müəllifi olduğu "Şuşanın Qoxusu Gəlir " adlı kitabın təqdimatı keçirilib.

Kitab 27 sentyabr 2020-ci ildə başlanan 44 günlük Vətən Savaşında qəhrəmanlıq nümunəsi göstərərək şəhidlik zirvəsinə yüksələn polkovnik-leytenant Təhməzov Elzamin Kamal oğlunun keçdiyi ömür və döyüş yoluna həsr edilib. "Azərkitab" kitab evində baş tutan təqdimatda millət vəkilləri Zahid Oruc, Ceyhun Məmmədov, yazıçı Elxan Elatlı, şəhidin ailə üzvləri, zabit dostları, şəhid anaları, gənclər, eləcə də Türkiyə Azərbaycan Qardaşlıq İctimai Birliyinin Bakı şəhəri üzrə sədri Günəş Quliyeva və Suraxanı rayon üzrə sədri Manaf İmanov iştirak edib. Təqdimatda çıxış edənlər şəhid polkovnik-leytenant Təhməzov Elzamin Kamal oğlunun ömür və döyüş yoluna nəzər salıb, onun 44 günlük savaşda imza atdığı qəhrəmanlıqlardan və Vətənə olan sevgisindən bəhs ediblər.

Kitab müəllifinin əməyini yüksək qiymətləndirən çıxışçılar kitabın gənc nəslin vətənpərvər ruhda böyüməsi üçün bir örnək olacağına və oxucular tərəfdən maraqla qarşılanacağına inamını bildiriblər. Şəhidin ailə üzvləri və zabit dostları da kitab qəhrəmanının nümunəvi ailə başçısı, cəsur döyüşçü və ləyaqətli bir şəxsiyyət olmasından söz açıb.

Sonda şəhid haqqında hazırlanmış videoçarx təqdim olunub, iştirakçılara müəllif tərəfindən kitabın imzalı təqdimatı keçirilib.

Xatırladaq ki, 2020-ci il sentyabrın 29-da Suqovuşan - Talış istiqamətində gedən döyüşlərdə qəhrəmancasına şəhid olan Elzamin Təhməzov ölümündən sonra "Vətən uğrunda", 3-cü dərəcəli "Rəşadət" ordeni, " Suqovuşan" medalı ilə təltif olunub.

Ailəli olub, iki qız övladı var.

Qeyd edək ki, Mənsurə Qaçayqızı Azərbaycan Pedaqoji Universitetinin riyaziyyat fakultəsini bitirib. Azərbaycan Yazıçılar Birliyinin üzvü, 5 kitab müəllifidir.


Günel İsayeva