Binəqədidə gənc şəhidin anım günü keçirilib.
Taq.az saytı xəbər verir ki, tədbir bugün Binəqədi rayonunda təşkil edilib. Tədbirdə şəhidin yaxınları, əsgər yoldaşları, ziyalılar, şəhid anaları, qazilər, rəsmi qurumların nümayəndələri, Türkiyə Azərbaycan Qardaşlıq Birliyinin sədri Kənan Adıgözəlov və Taq.az saytının əməkdaşı iştirak edib. Çıxış edənlər Şəhid Əhmədov Tacir Mehdi oğlunun qısa ömür və şərəfli döyüş yoluna nəzər salıb, onun 44 günlük müharibədəki etdiyi qəhrəmanlıqlardan danışıblar. Bildirilib ki, 19 yaşında Azərbaycan Ordusunun əsgəri olan Tacir Əhmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin və Xocavəndin azadlığı uğrunda gedən döyüşlərdə qəhrəmancasına savaşıb, yaşından böyük igidlik göstərib. Mərd, cəsur və şücaətli xarakterə malik olması onu həmyaşıdlarından fərqləndirən əsas keyfiyyətləri olub ki, qısa ömründə şəhid kimi şərəfli adı qazanıb, Vətənin şərəfli tarixinə adını həkk edib. Türkiyə Azərbaycan Qardaşlıq İctimai Birliyinin sədri Kənan Adıgözəlov da çıxış edərək şəhid haqqında xoş fikir və düşüncələrini yaxınları ilə bölüşüb, gənc yaşında şəhidlik zirvəsinə ucalmaqla Tacir Əhmədov qəhrəman bir igid, vətənpərvər bir övlad olduğunu sübut etdiyini, Vətəni öz canı, qanı ilə qorumağı bacardığını qeyd edib. Çıxışın sonunda birlik sədri Taq. az saytı adından hazırlanmış "Fəxri Diplomu" şəhidin atasına təqdim edib.
Anası Həlimə xanım da tədbirdə oğlu haqqında ürək sözlərini belə ifadə edib: "Tacir bizim fəxrimizdir, Xüsusi təyinatlı olub. Onun döyüş yoldaşları sonradan onun qəhrəmanlığı haqqında geniş danışdılar. Bir ana kimi onunla qürur duyuram. Vətəni seçdi oğlum bu cavan yaşda. Onun üçün vuruşdu. Allah bütün oğulları qorusun. Sağ qalan qazilərə yardımçı olsun. Vətən başın sağ olsun! "
Sonda şəhid ruhuna dualar verilib, ehsan süfrəsi təşkil edilib, müharibə iştirakçıları ilə xatirə şəkil çəkdirilib.
Qeyd edək ki, 19 yaşlı Tacir Əhmədov hərbi xidmətə yollandıqdan sonra orda MAXE kimi qalaraq Azərbaycan Silahlı Qüvvələrinin Xüsusi Təyinatlısı kimi müddətdən artıq hərbi xidmətini davam etdirib. Ötən ilin oktyabrın 20-də Xocavənd döyüşləri zamanı qəhrəmancasına şəhid olub. Şəhid Binəqədi rayonunda dəfn olunub.
Ölümündən sonra Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Tacir Əhmədov ölümündən sonra "Vətən uğrunda", Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən ölümündən sonra "Xocavəndin azad olunmasına görə" və Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 24.06.2021-ci il tarixli Sərəncamına əsasən "Füzulinin azad olunmasına görə" medalları ilə təltif edilib.
Günel İsayeva
Taq.az
