Bugün onların da ad günüdür...
24 dekabr həm də onların ad günüdür. Gəncdirlər, amma qısa ömrə böyük tarixi sığdıra biliblər. 44 günlük tarixi qələbə onların sayəsində, onların igidliyi və qəhrəmanlığı hesabına əldə olundu.
Onları tanımaq və tanıtmaq bizim borcumuzdur.
Bugün Vətən Savaşının şəhid qəhrəmanlarından doqquzunun doğum günüdür. Onları TAQ.az saytı vasitəsilə oxuculara tanıdaq.
Naxçıvan Xüsusi Təyinatlı Qüvvələrinin Leytenantı Feyzullayev Zahir Eyvaz oğlu 1994-cü ilin bu günü Oğuz rayonun Muxas kəndində anadan olub. 2011-2012-ci illərdə hərbi xidmətini başa vurduqdan sonra 2013-cü ildə gizirlik kursunu bitirib. Azərbaycanda və Türkiyədə keçdiyi bütün kurslarda yüksək nəticə əldə etdiyi üçün XTQ-yə hərbi qulluqçu kimi qəbul edilib. Zahir feyzullayev İkinci Qarabağ müharibəsi vaxtı Füzuli, Zəngilan və Xocavənd istiqamətlərində gedən döyüşlərdə iştirak edib. Son döyüşü Xocavənd rayonunun Tuğ kəndi uğrunda olub və 19 oktyabrda orada şəhid olub. O, şəhid olan hər döyüş yoldaşının dəfn olunduğu gün ailəsinə zəng edərək onun qisasını onlarla ermənini məhv etməklə aldığını bildirib. Zahir Feyzullayev Xidməti boyunca "Azərbaycan Ordusunun 100 illiyi" yubiley medalı, "Hərbi xidmətdə fərqlənməyə görə" 3-cü dərəcəli medalı ilə təltif olunub. Şəhid olandan sonra isə "Vətən uğrunda", "Şuşanın azad olunmasına görə", "Hərbi xidmətlərə görə" medalları ilə təltif olunub.
Əsgər Abbasov Zülfüqar Bayram oğlu 1995-ci ilin bu günündə Gədəbəy rayonunda anadan olub. Savaş başlanan zaman döyüşə atılan Zülfüqar Füzulinin və Xocavəndin azadlığı uğrunda gedən döyüşlərdə savaşıb. Zülfüqar Abbasov noyabrın 10-da Xocavənd döyüşləri zamanı şəhid olub. Tovuz rayonunda dəfn olunub. Ölümündən sonra “Vətən uğrunda”, “Hərbi xidmətlərə görə”, eləcə də Füzulinin və Xocavəndin “işğaldan azad olunmasına görə” medallarına görə təltif edilib.
Əsgər Allahverdiyev Sakit Şahin oğlu 2001-ci ilin bu günü Ağstafa rayonun Tatlı kəndində dünyaya göz açıb. Vətən müharibəsinə ilk gündən qatılan qəhrəman Sakit Murovdağın, Füzulinin, Cəbrayılın, Xocavəndin və Şuşanın azadlığı uğrunda gedən döyüşlərdə vuruşub. 9 noyabr 2020-ci ildə Şuşa istiqamətində döyüş tapşırığının yerinə yetirilməsi zamanı şəhid olub. 13 noyabr 2020-ci ildə Çaylı kəndinin qəbiristanlığında dəfn edilib. Ölümündən sonra “Vətən uğrunda”, “Hərbi xidmətlərə görə”, eləcə də Xocavəndin, Şuşanın və Kəlbəcərin işğaldan azad olunmasına görə medalları ilə təltif edilib.
Əsgər Atakişiyev Rüstəm Zahid oğlu 2000-ci ilin bu günü Qəbələnin Tüntül kəndində anadan olub. Kasıb ailənin zəhmətkeş övladı olan Rüstəm bala az yaşına çox əziyyətlər sığdırıb. Xüsusi Təyinatlı Qüvvələrdə baş snayperçi kimi yetişib. Vətən müharibəsi zamanı Cəbrayılın, Füzulinin və Şuşanın azadlığı uğrunda gedən döyüşlərdə savaşıb. Füzuli döyüşləri zamanı yaralansa da, savaşmağa davam edib. Döyüşlər zamanı Ermənistan Ordusunun 10-dan çox hərbçisini məhv edib. Rüstəm Atakişiyev oktyabrın 21-də Şuşa rayonu istiqamətində şəhid olub. Qəbələ rayonunda dəfn olunub. Ölümündən sonra qəhrəman vətən oğlu “Cəsur döyüşçü”, “Vətən uğrunda” və Füzuli rayonun işğaldan azad olunmasına görə medalları ilə təltif edilib.
Azərbaycanın Daxili İşlər Nazirliyinin Daxili Qoşunlarının baş çavuşu, Babayev Orxan Sədail oğlu 1994 –cü ilin bu günündə Astara rayonunda anadan olub. Vətən müharibəsi zamanı Şuşanın azadlığı uğrunda gedən döyüşlərdə savaşan Orxan Babayev noyabrın 7-də Şuşa döyüşləri zamanı şəhid olub. Ölümündən sonra “Vətən uğrunda” və “Şuşanın azad olunmasına görə” medalları ilə təltif edilib.
Növbəti şəhidimiz Hacıyev Toğrul Rüfət oğlu 1996-cı ilin bu günü dünyaya göz açıb. Ali təhsillidir. Milli Konservatoriyanın bakalavr və magistr pilləsini oxuyub. Vətən müharibəsi zamanı Füzulinin azadlığı uğrunda gedən döyüşlərdə savaşıb. Toğrul Hacıyev oktyabrın 10-da Füzuli döyüşləri zamanı şəhid olub. Binəqədi rayonunda dəfn olunub. Ölümündən sonra “Vətən uğrunda” və Füzulinin azad olunmasına görə” medalları ilə təltif edilib.
Yazımızın bir igid qəhrəmanı da İsmayılov İntiqam İlyas oğlu da 1996-cı ilin bu günündə Yevlax rayonun Xanabad kəndində doğulub. Boksçu olub qəhrəmanımız və bir sıra uğurları da olub onun. Murovdağın, Xocavəndin və Şuşanın azadlığı uğrunda gedən döyüşlərdə vuruşub İntiqam. 9 noyabr 2020-ci ildə Şuşa istiqamətində döyüş tapşırığının yerinə yetirilməsi zamanı şəhid olub. Doğulduğu Yevlax rayonunun Xanabad kəndində dəfn olub. Ölümündən sonra Kəlbəcərin, Şuşanın, Xocavəndin işğaldan azad olunmasına görə medalları ilə təltif olunub.
Qulamlı Afiq Fərhad oğlu da bu gün doğum günü olan qəhrəmanlarımızdandır. 1996-cı ildə Füzuli rayonun Gecəgözlü kəndində doğulub. 2016-cı ilin aprel döyüşlərində iştirak edib. 44 günlük savaşda isə Füzulinin, Cəbrayılın, Xocavəndin azadlığı uğrunda gedən döyüşlərdə vuruşub. 19 oktyabr 2020-ci ildə Füzuli rayonunun Gecəgözlü kəndi istiqamətində döyüş tapşırığının yerinə yetirilməsi zamanı şəhid olub. İgidliyi ilə həmişə seçilməyi bacarıb. “Vətən uğrunda” və “Xocavəndin azad olunmasına görə” medalları ilə təltif edilib.
Bugün doğum günü olan son şəhid qəhrəmanımız Sadıqov Vüsal İsmayıl oğludur. O, 1990-cı ilin bu günü Füzulinin Əhmədbəyli kəndində zəhmətkeş bir ailədə anadan olub.
Vətən müharibəsi zamanı torpaqlarımızın azadlığı uğrunda gedən döyüşlərdə savaşıb və sentyabrın 28-də Füzuli döyüşləri zamanı qəhrəmancasına şəhid olub. Ölümündən sonra “Vətən uğrunda”, “Döyüşdə fərqlənməyə görə” və “Füzulinin işğaldan azad olunmasına görə” medalları ilə təltif olunub.
Doğum gününüz mübarək, ŞƏHİDLƏR!
Ruhunuz şad olsun!
