Tədbir "Tarixi Həqiqətlərin Öyrənilməsi" İctimai Birliyi tərəfindən "Azərkitab" adlı kitab mərkəzində keçirilib.
Tədbirdə ziyalılar, şəhid ailələri, qazilər, media nümayəndələri, QHT rəhbərləri, şair və yazarlar iştirak edib. Dövlət himninin səsləndirilməsi ilə açılan tədbirdə şəhidlərin ruhu bir dəqiqəlik sükutla yad olunub, İctimai Birliyin ölkə prezidentinin 60 illik yubileyi ilə əlaqədar hazırladığı təbrik videoçarxı qonaqlara təqdim edilib. Daha sonra "Tarixi Həqiqətlərin Öyrənilməsi" İctimai Birliyinin sədri Lalə Cavadqızı çıxış edərək milli öndər Heydər Əliyev irsinin, fəaliyyətinin araşdırılmasını, dünya azərbaycanlılarının birliyi naminə 1991-ci 31 dekabr tarixində həmrəylik gününü təsis edilməsini yüksək qiymətləndirib. Ölkə prezidenti İlham Əliyevin də bu siyasəti layiqli şəkildə davam etdirməsi, 44 günlük müharibədə ali baş komandanın başçılığı ilə azərbaycanlıların birliyi sayəsində torpaqların işğaldan azad olunması diqqətə çatdırılıb. Digər çıxışçılar da dünya azərbaycanlıların həmrəyliyini yüksək qiymətləndirib, bütün azərbaycanlıları bir olmağa, vətən uğrunda fədakarlıq edən qəhrəmanları unutmamağa səsləyiblər. Eləcə də 44 günlük müharibə iştirakçılarının qəhrəmanlıqlarından, 3 min şəhid və 10 minə yaxın qazilərin fədakarkığından da bəhs olunub. Ölkə tarixinin vacib həqiqətlərinin araşdırılmasının və öyrənilməsinin vacibliyi vurğulanılıb. Türkiyə Azərbaycan Qardaşlıq İctimai Birliyinin də sədr və nümayəndələrinin iştirak etdiyi tədbirdə birliyin Səbail rayon üzrə sədri Yeganə Qəhrəmanova çıxış edərək dünyanın müxtəlif ölkələrində, şəhərlərində ölkəmizlə, xalqımızla bağlı onun gerçək tarixi həqiqətləri ilə əlaqədar edilən yanlışlıqlardan bəhs edərək birlik naminə inamla və doğrularla addımlamağı önəmli hesab edib. Yeni yaranan Türkiyə Azərbaycan İctimai Birliyinin türk xalqlarının birliyi, inkişafı və tarixi həqiqətlərinin üzə çıxması fonunda yaradılmış böyük layihə olduğunu da əlavə edib.
TAQ. az saytının Baş redaktoru Abil İslam da çıxış edərək Türkiyə Azərbaycan Qardaşlıq İctimai Birliyinin iki qardaş millət arasında yaradılan ilk birlik olduğunu və türk birliyi naminə çalışmalar həyata keçirdiyini qeyd edib.
Tədbirdə istedadlı məktəbli Nuray Səlimovanın vətənpərvərlik və iki qardaş millətin birliyinə dair şeirləri, eləcə də Bakı İncəsənət gimnaziyasının şagirdlərinin şeirlərindən ibarək kompozisiyası təqdim olunub.
Sonda tədbir iştirakçıları ilə birgə xatirə şəkli çəkdirildi.

Günel İsayeva