Bugün "Türkiyə Azərbaycan Qardaşlıq" İctimai Birliyinin toplantısı keçirilib. İclasda yeni yaranmaqda olan İctimai Birliyin sədrləri və müavinləri daxil 50 nəfər iştirak edib.

Tədbiri TAQ. az saytının Baş redaktoru Abil İslam çıxış nitqi ilə açaraq iclas iştirakçılarını salamlayıb, iclasın "tanışlıq, təşkilatlanma, yeni təyinatlar, görülən işlər və təkliflər" adlı mövzusunu və rəyasət heyyətin üzvlərini açıq elan edib. Türkiyə Azərbaycan Qardaşlıq İctimai Birliyin sədri Kənan Adıgözəlov növbəti çıxışçı olaraq bildirib ki, birliyin yaradılması uğrunda bu ilin ikinci yarısından etibarən işlərə start verilib, bir sıra tədbirlər keçirilib, İctimai Birliyin Nizamnaməsi tərtib olunub, Bakı şəhəri və regionlar üzrə 20-dən artıq sədr, onların müavinləri seçilib, çoxsaylı üzvlər cəlb edilib. Eləcə də TAQ. az saytı adından rəsmi dövlət qurumlarına və nazirliklərə müraciət ünvanlanıb, bəzilərindən müsbət cavablar alınıb. Sədr həmçinin birliyin nizamnaməsindən və qarşıya qoyduğu məqsəd və vəzifələrindən bəhs edib. Hazırda Türkiyədə İctimai Birliyin sənədlərinin rəsmiləşdirilməsi istiqamətində işlərin getdiyini də diqqətə çatdırıb. Çıxışı TAQ İB - nin yekdilliklə iclas sədri seçilən birliyin Hüquq, Humanitar və İdeoloji işlər üzrə sədr müavini Səkinə Bayramova davam etdirib. Filologiya elmləri doktoru türkdilli ölkələrdə zaman-zaman böyük elmi, ədəbi konfranslarda iştirak etdiyini, orda olarkən daima türk dünyasının birliyi, milli köklərə, türk kökənliyinə, milli şüura qayıdış baxımından İctimai Birliyin vacib olduğunu hiss edib. Hazırda Azərbaycanda yaranmasını isə vacib zərurət hesab edib. Səkinə xanım bu mövzuda məşhur turançı, böyük ədib Əli bəy Hüseynzadənin xidmətlərini yüksək qiymətləndirib, onun "türkləşmək, islamlaşmaq və müasirləşmək" şüarından doğan ideyalarını əsas götürüb.
Rəyasət heyyətinin növbəti çıxışçısı İctimai Birliyin Bakı şəhəri üzrə sədri Günəş Quliyeva isə birliyin önəmindən və iki qardaş millətə verəcəyi böyük töhfələrindən bəhs edib. Bu birliyin Turana gedən yolda bir körpü olduğunu deyərək tarixən Azərbaycan və Türkiyənin ağır günlərində bir - birinə həyan olduğunu dilə gətirib. Bildirib ki, həm 1918-ci ildə tarixi Cümhuriyyət qurulanda, həm son 44 günlük müharibədə Türkiyə Azərbaycanı dəstəkləyən və ilk diplomatik münasibətlər quran ölkə olub. Bakı şəhər 93 nömrəli məktəbin 1-ci sinif şagirdi, istedadlı qiraətçi Nuray Səlimovanın İctimai Birliyin rəmzi himni sayılan "Türkiyə-Azərbaycan" şeirini səsləndirməsi, Vətən, şəhidlər haqqında maraqlı çıxışı isə yadda qalan olub. TAQ. az saytı adından balaca istedadlıya "Fəxri Diplom" təqdim olunub, şəhidlərin xatirəsi birdəqiqəlik sükutla yad olunub.
İclasın ardıcıllıqla növbəti çıxışçıları TAQ İB - nin mətbuat katibi jurnalist, şairə Südabə Sərvi, Səbail Rayon sədri filologiya elmlər namizədi Yeganə Qəhrəmanova olub. Hər iki rəyasət heyyətin üzvü türkçü olaraq İctimai Birliyin yaranmasını və məramını yüksək qiymətləndirib. İki qardaş millətin tarixi, mədəni bağlılığını, zaman-zaman bir-birinə göstərdiyi köməkliyi qeyd edərək 100 illik tarixi olan qardaşlıq münasibətlərinin daha da təbliğ edilməsini, qarşılıqlı işbirliyi qurmağı, bir amal ətrafında sıx möhkəmlənməyi vacib hesab ediblər. Tədbirdə qazilərdən Arif Məhərrəmov və Elvin Abbasov da çıxış edərək keçdikləri şərəfli döyüş yolundan və türk birliyinin əbədiliyindən bəhs ediblər.
Tədbirin davamında sözhaqqı olaraq TAQ İB-nin qadınlar şurası üzrə sədri Elmira Əliyeva, Qusar rayon sədri Natiq Ağabəyov, Xəzər rayon sədri Telman Kərimzadə, Balakən rayon sədri Nəfisət Vahid, Saatlı rayon sədri Bikə Allahverdiyeva, Ağdam rayon sədri Nadir Qədimli, Masallı rayon sədri Zahir Yaqubov, Şirvan şəhər sədri İlham Babayev, Gəncə şəhər sədri Məsudə Sadıqlı, Şamaxı rayon sədri Zahir Fərəcov və digər rayon sədrlərinin müavinləri də çıxış edərək birliyin gələcəyi naminə ciddi işlər görəcəyini, təşkilatlanmada və konkret təkliflər irəli sürülməsində aktiv olacaqlarına söz veriblər. Bəzi iştirakçılar tərəfindən təkliflər irəli sürülüb, onları narahat edən suallar müzakirə edilib.
Sonda tədbir iştirakçıları TAQ İB-nin sədri tərəfindən iki dövlətin rəmzi bayraq döş nişanı ilə təltif edilib və birgə xatirə şəkili çəkdirilib.

Günel İsayeva