Bugün TAQ İB - in baş ofisində keçirilən növbəti sədr seçimi təqdimatı uğurla baş tutdu. Təqdimatı TAQ. az saytının baş redaktoru Abil İslam giriş sözü ilə açaraq bildirdi ki, qısa müddətə İctimai Birlik çərçivəsində formalaşmaq, təşkilatlanmaq istiqamətində işlərə start verilib. İndiyə qədər birlik daxilində bir neçə sədr təyinatı gerçəkləşib ki, bu da birliyin gələcək fəaliyyətinin daha perspektivli və genişmiqyaslı olması naminədir. TAQ İB - də növbəti təyinat birliyin Respublika üzrə Veteranlar Şurasının sədri vəzifəsi üzrə idi. Həmin vəzifəyə Azərbaycan Respublikası Prezidentinin və Silahlı Qüvvələrinin fəxri təqaüdçüsü, 20 Yanvar və Vətən müharibəsinin veteran əlili, şəhid qardaşı, Çeçenistanın ilk Fəxri Vətəndaşı və Millət Qəhrəmanı Arif Məhərrəmov təyin olundu. Yeni sədr təyinatını yüksək qiymətləndirib ona olan etimadı gələcək fəaliyyətində doğruldacağına söz verdi: " İctimai Birliyin yaradılmasını və qarşıya qoyduğu fəaliyyət proqramını yüksək qiymətləndirir və mənə olan etimadı bir Vətən və Turan sevdalısı, mübarizəçisi kimi dəyərləndirirəm. Bir ömrüm, ancaq müharibə və mübarizələrdə keçib. Özüm Qars bölgəsindən olsam da yolum Türkiyəyə düşəndə Çanaqqalaya gedir, torpaq uğrunda, Vətən uğrunda canından keçənləri ziyarət edirəm. Hər zaman türk dünyası birliyi naminə çalışıram. Türk xalqı əyilməz, güclü və mübarizdir. Onları hərbi güc deyil, həm də siyasi, mədəni, dil, millət birliyi, doğmalığı birləşdirir. Boz qurd işarəsi bu birliyin bariz rəmzidir. Yaşasın Türkiyə, Yaşasın Azərbaycan və Yaşasın bu iki qardaş millətin birliyi"
Təqdimatın sonunda TAQ İB - in sədri Kənan Adıgözəlov iki qardaş dövlətin rəmzi simvolu sayılan bayraq döş nişanı ilə Arif Məhərrəmovu təltif etdi.