"Türkiyə Azərbaycan Qardaşlıq" İctimai Birliyinin əhatə dairəsi və üzvləri günbəgün artmaqdadır. Bu ilin ikinci yarısından etibarən İctimai Birliyin və onun TAQ. az saytının yaradılması istiqamətində işlərə start verilib. Artıq son bir ay ərzində həm birlik naminə, həm saytda müəyyən işlər görülüb. Birlik daxilində tədbirlər təşkil olunub. Bakı şəhəri və regionlar üzrə 20 sədr seçilib və çoxsaylı üzvlər qəbul edilib, İctimai Birliyin Nizamnaməsi tərtib edilib, Respublikanın rəsmi qurum və nazirliklərinə TAQ.az saytı adından 21 rəsmi müraciət göndərilib. Artıq onlardan bir neçəsinə müsbət olaraq cavab da gəlib. TAQ.az saytı onlarla rəsmi əməkdaşlığa başlayıb, gündəlik elektron poçta göndərilən məlumatlar sayəsində saytımız daha da özəl mənbələr hesabına xəbərlərlə zənginləşir, aktivləşir. Təbii ki, bu da həm İctimai Birlik, həm də onun rəsmi saytı olan TAQ.az adına uğurdur, nailiyyətdir. Bu mövzu ətrafında bugün TAQ İB - nin sədri Kənan Adıgözəlov, sədr müavini pedaqoq, filologiya elmlər doktoru Səkinə Bayramova və TAQ. az saytının Baş redaktoru Abil İslam birgə geniş müzakirələr aparıb, ilk keçirələcək iclasın mövzusu və planları barədə diskusiya ediblər. Bildirilib ki, hər həftənin bazar ertəsi və cümə günləri onlayn vasitəsilə İctimai Birliyin sədrləri, müavinləri və üzvləri ilə
“Tanışlıq, təşkilatlanma, yeni təyinatlar, görülən işlər və təkliflər” barəsində mütəmadi iclaslar keçirilir, müzakirələr aparılır. Həmçinin "Türkiyə Azərbaycan Qardaşlıq" İctimai Birliyin əsas məqsəd və vəzifəsi 100 illik tarixi olan qardaşlıq münasibətlərinin daha da təbliğ edilməsinə və möhkəmləndirilməsinə xidmət etmək, bu istiqamətdə silsilə tədbirlər, təlimlər, konfranslar, görüşlər keçirmək, maarifləndirmə prosesini artırmaq, iki dövlət daxilində qeyri-hökümət təşkilatları, şirkətləri, rəsmi, özəl qurumları ilə əməkdaşlıq etmək, mədəni, iqtisadi, təhsil, səhiyyə, sosial və turizm sahələrində qarşılıqlı işbirliyi qurmaq, şirkət və dövlət qurumlarını birlik ətrafında sıx əməkdaşlığa cəlb etmək barədə də fikir mübadiləsi aparılıb. İctimai Birlik hazırda ölkədə iki dövlət arasında yaradılmış ilk İctimai Birlikdir. Birliyin sənədləri hazırlanıb, hazırda qardaş Türkiyədə sənədlərin rəsmiləşdirilməsi istiqamətində işlər davam etməkdədir.
Qısa zamanda dəyərli ziyalılar və iki dövlət arasında xidməti fəaliyyəti olan şəxslərin birliyə cəlb olunması aktual mövzu kimi gündəmdə saxlanılacaq. Məqsəd bütün rayonlar üzrə İctimai Birliyin sədrlərini təyin etmək və birliyin üzvlərinin sayını artırmaqdır.
Qeyd edək ki, sabah Türkiyə Azərbaycan Qardaşlıq İctimai Birliyin tam tərkibdə ilk iclası keçiləcək. Tədbirdə təşkilatlanma, planlaşdırma, görülən və görüləcək işlər barədə geniş müzakirələr aparılacaq.

Günel İsayeva