"Son günlər xəbərlərdə oxusam da, baha çörəyi nəhayət ki, bu gün aldım.
30% bahalanma var"
Bu fikirlər iqtisadçı- ekspert Rövşən Ağayev tərəfindən bildirilib. Onun sözlərinə görə son 10 ildə çörəyin çəkisinə təsir olsa da, qiymətin çox artımına cəhd olunmayıb.
Bu müddət kəsiyində iqtisadiyyatda qiymət miqyası ən azı 2 dəfədən çox böyüyüb.
" Məsələn, rəsmi təsdiqlənən yaşayış minimumu 2010-cu ildən bəri 2.5 dəfə artıb. İnflyasiya ilə manipulyasiya ehtimallarına inandığım üçün real qiymət miqyasının daha çox böyüdüyünə əminəm.
Bu fikirlə tez-tez rastlaşıram ki, azərbaycanlılar çörəkdən çox istehlak etdiyi üçün çörəyin qiymətinə həssasdır. Bu nəticəyə baxıb qiymət verməkdir. Səbəb isə odur ki, əksinə ölkədə kasıblıq daima problem olduğu üçün biz çörəyə qarşı həssasıq. Çünki çörək daha çox yoxsulların qida rasionunda üstünlük paya malikdir.
Kalorili, çeşidli qidalar yemək imkanına sahib ev təsərrüfatlarında istehlak strukturu fərqlidir"

Çörək və un məhsullarının qiymət artımını dünyada taxılın qiymətinin bahalanması ilə əsaslandırıldığını deyən ekspert taxıl ucuclaşsa da, qiymətlərin enməyəcəyini bildirdi. Səbəbi isə iqtisadiyyatın rəqabətli olmaması, çörək sənayesində un istisna digər xərclər (işçi qüvvəsi, elektrik, çatdırma, cari təmir və bərpa, zəruri avadanlıqların alınması və onlara cari qulluq və s) də xeyli artsa da, bu seqmentdə qiymətlərin dəyişməməsi ilə əlaqəlidir. Bununla da taxılın qiyməti əslində qiymət artımı üçün bir fürsət oldu.
İqtisadçı ekspert Rövşən Ağayev 15%-lik qida inflyasiyasına da aydınlıq gətirib. Ekspertin sözlərinə görə bu inflyasiya son 5 ilin ən yüksək göstəricisidir. 2022-ci ildə qida inflyasiyasının daha yüksək olması isə qaçılmazdır.
"Bu ehtimalı gücləndirən bir neçə amil var.
İlk növbədə idxaldan yüksək asılılığımız var və qlobal inflyasiyanın 2022-ci ildə də problem olacağı görünür.
İkincisi, rəsmi statistikaya görə, 2021-ci ilin noyabrında Azərbaycanda qida istehsalçılarının qiymət indeksi istehlakçı qida qiymət indeksindən daha yüksək olub (18%-ə yaxın). Adətədən istehsalçı qiymət indeksinin İQİ-nə yansıması zaman aparır. Çünki pərakəndə satış anbarlarında ehtiyyatlar hesabına 2-3 ay ərzində köhnə qiymətlərlə satışlara davam etmək olur. Ona görə də biz daha yüksək qida istehsalçılarının qiymət indeksinin təsirlərini bu aylarda hiss edəcəyik.
Üçüncü vacib məqam - inflyasiya səbətində yüksək payı olan çörək və un məmulatlarının çox yüksək qiymət artımlarının inflyasiyaya yansıması bu il baş verəcək"

Günel İsayeva