Bu gün təltif olunan rabitə və informasiya texnologiyaları sahəsi işçilərinin dövlət mükafatlarının təqdimetmə mərasimi keçirilib. Tədbirdə rəqəmsal inkişaf və nəqliyyat naziri Rəşad Nəbiyev təltif olunan sahə işçilərini təbrik edib, nazirliyin ötən il əldə etdiyi nailiyyətlər, xüsusilə işğaldan azad edilmiş ərazilərdə görülmüş işlər haqqında məlumat verib.

Bildirilib ki, 150 min ev təsərrüfatında müasir yüksək sürətli internetə imkan verə bilən fiber-optik xətlər çəkilib. 2024-cü ilin sonunadək evlərin 100 faizi müasir texnologiyalarla yüksək sürətli internetlə təmin ediləcək.

Həmçinin məlumat verilib ki, 2021-ci ildən avtomobillərə “Fərqlənmə nişanı”nın verilməsi proseduru sadələşdirilib, avtomobil nəqliyyatı ilə beynəlxalq daşımalar üçün “İcazə blankları”nın bölgüsü qaydaları dəyişdirilib, dənizçilərə sertifikatların verilməsi prosesi sadələşdirilib.

İşğaldan azad olunmuş ərazilərdə ötən il ərzində təxminən 50 faiz ərazidə “4G” mobil texnologiyaların şəbəkəsi qurulub, 35 faiz teleradio yayımı bərpa edilib, 4 istiqamətdə poçt xidmətlərinin göstərilməsinə başlanılıb. Eyni zamanda, 1400 km uzunluğunda fiber-optik xətlərin çəkilişi davam etdirilir. Hazırda 1500 km-dən çox avtomobil yollarının, 3 hava limanının, regionu digər regionlarla bağlayan strateji dəmir yollarının inşası üzrə işlər davam edir.

Sonra tədbirdə Azərbaycanda telefon rabitəsinin yaradılmasının 140 illik yubileyinə həsr edilmiş sənədli film nümayiş etdirilib.

Tədbirin davamında 3-cü dərəcəli “Əmək” ordeni, “Tərəqqi” medalı və “Əməkdar mühəndis” fəxri adı ilə təltif olunmuş şəxslərə dövlət mükafatları təqdim olunub.

Sonda Azərbaycan Respublikası Prezidentinin 23 iyun 2021-ci il tarixli “Dövlət qulluqçularının təltif edilməsi haqqında” Sərəncamı ilə Rəqəmsal İnkişaf və Nəqliyyat Nazirliyinin təltif olunmuş əməkdaşlarına medallar təqdim edilib.

Günel İsayeva.