TAQ. az saytı xəbər verir ki, tədbir İctimai Birliyin baş ofisində reallaşıb. Tədbirdə Bakı şəhəri üzrə təyin edilən rayon sədrləri, müavinləri və TAQ. az saytının əməkdaşları iştirak edib.
Tədbiri giriş sözü ilə açan TAQ İB - nin sədri Kənan Adıgözəlov "Təşkilatlanma, planlaşdırılan işlər , yeni təyinatlar və görülən işlər" mövzusunda çıxış edib. İctimai Birliyin sədr müavini Səkinə Bayramova yeni ildə birlik daxilində ilk toplantı olaraq Bakı şəhəri üzrə təmsilçilərin həyata keçirdiyi işlər və vəzifələr barədə ətraflı müzakirələr aparıb, dinləmələr həyata keçirib. Birlik daxilində görülən işlər təqdirəlayiq hesab edilib və çatışmazlıqlar diqqətə çatdırılıb.
Daha sonra TAQ. az saytının əməkdaşı Sevil Qəmbərli birliyin nizamnaməsini təmsilçilər üçün məruzə edib və nizamnamə maddələri üzrə müzakirələr davam etdirilib.
Ardınca çıxış üçün söz növbə ilə İctimai Birliyin Bakı şəhəri üzrə sədri Günəş Quliyevaya verilib. Bakı sədri indiyə qədər birliyin Bakı üzrə təyin edilən rayon sədrləri və müavinləri barədə, planlaşdırılan işlər və çatışmazlıqlar barədə məlumat verib. Məlum olub ki, Bakı üzrə İctimai Birliyin Binəqədi, Nərimanov rayonları istisna, digər rayonların sədrləri təyin olunub. İclasda nəzərə alınıb ki, artıq Bakı şəhəri üzrə görülən işlər, həyata keçirilən layihələr və edilən təkliflər barədə aylıq məruzələr Bakı sədri Günəş Quliyevaya, sədr isə öz növbəsində birlik sədri Kənan Adıgözəlova təhvil verəcək.
Nəsimi rayon sədri Tahirə Məmmədova isə İctimai Birliyin gələcək inkişafı naminə konkret təkliflərlə çıxış edib. Tədbir daha sonra birliyin Səbail rayon sədri Yeganə Qəhrəmanovanın, Sabunçu rayon sədri Zakir Quliyevin, Suraxanı rayon sədri Manaf İmanovun, Abşeron rayon sədr Nahid Mansurovun və digər çıxışçıların məruzələri ilə davam etdirilib.
Sonda yeni təyinatlar TAQ İB-nin sədri Kənan Adıgözəlov tərəfindən iki ölkənin bayrağına aid döş nişanı ilə təltif edilib.
Qeyd edək ki, növbəti həftədən etibarən İctimai Birliyin onlayn görüşləri həftənin bazar ertəsi saat 21:00-da Zoom proqramı ilə həyata keçiriləcək.

Günel İsayeva