“Qarabağ” UEFA Çempionlar Liqası pley-off mərhələsinin cavab oyunu çərçivəsində İngiltərədə “Nyukasl”ın qonağı olacaq.

Ağdam təmsilçisinin baş məşqçisi Qurban Qurbanov matçdan öncə keçirilən mətbuat konfransında fikirlərini bildirib.

“Cavab oyununa gedirik. Əlbəttə ki, qarşılaşma haqda danışmaq asan deyil. İlk matçdakı nəticəyə görə belədir. Hər halda, üzərimizə düşən vəzifədir, oyun haqda fikirlərimizi bölüşməliyik. Bir neçə gün vaxtımız oldu ki, oyunu təhlil edək. Deyiləcək çox fikir yoxdur. Bəli, rəqib bizi üstələdi. Cavab oyununda daha diqqətli, daha mübariz, daha məsuliyyətli olmalıyıq. Çünki gedəcəyimiz yol uzundur, rəqib doğma meydanda oynayır. Ümumən pis hazırlaşmadıq. Psixoloji zərbə alsaq da, ümumi hazırlığımız pis deyil. Çalışacağıq ki, cavab oyununda özümüzü yaxşı tərəfdən göstərək”, - Q.Qurbanov qeyd edib.

Çalışdırıcı daha sonra jurnalistlərin suallarını cavablandırıb:

- İlk matçın ikinci hissəsində daha yaxşı oynadınız. Beşli müdafiəyə keçdikdən sonra belə oldu. Bu sistemi “Nyukas”la səfər matçında və ya qarşıdakı matçlarda yenə də görə bilərik?

- Gələcəkdə bu sistemlə oynamaqla bağlı fikrim yoxdur. Etdiyimizi daha da yaxşılaşdırmaq istəyirik. Sadəcə bu matçda rəqib çox hazırlıqlı idi, bəlkə də ən hazırlıqlı oyunlarından biri idi. Bir neçə tur əvvəl düşünə bilərdik ki, idman performansında geriləmə var, amma onlar çox yaxşı forma yığmışdılar. Düşündükləri hər şey alındı. Biz isə ilk dəqiqələrdə qollar buraxdıq, komanda nokauta düşdü, birinci hissədə özümüzə gələ bilmədik. Fasilədə paltardəyişmə otağında danışdıq, bəlkə daha sərbəst və daha diqqətli oldular. Belə sistemə nadir hallarda əl atmışam. Hansısa oyunlarda bu mümkündür. Biz bir addım irəli getdikcə, rəqiblərin ciddiliyi, səviyyəsi daha da böyüyür. Hansısa oyunlarda ola bilər, amma gələcəkdə belə sistemdə oynayacağıq deyə, fikrim yoxdur. Ümumən 5-4-1 sistemi məni cəlb edən sistemlərdən biridir.

- Açıq məşq və mətbuat konfransı Bakıda oldu. Hazırlıq planının bu cür olması nə ilə bağlıdır?

- Bizdə belə hallar olub. Bərpa üçün daha çox vaxt lazım idi, buradakı hazırlıq mənim üçün daha önəmli idi. İki gün əvvəl getsəydik, məşq planımız daha çox pozulurdu. 7 saat havada olacaqdıq, 11-12 saat yolda keçirəcəkdik, əlavə yüklənmə olardı. Düşündük ki, ən azından hazırlığımız normal olsun. Ona görə belə proqram tutduq. Sabah səhər Nyukaslda məşqimiz olacaq. Oyunda daha aktiv olmaq üçün bu addımı atdıq.

- Bəhlul Mustafazadə zədəlidir, Sami Mmae oynamayacaq. İndiki məqamda Sami niyə ümidləri doğrultmadı? Qarşıdakı üç ayda mərkəz müdafiəsi məsələsi sizi nə dərəcədə qayğılandırır?

- Ola bilər ki, Sami Mmaedən düşündüyümüzü ala bilmədik. Amma hər bir halda, başqa variantlar axtarmışıq, onlar üzərində dayanacağıq. Hazır olanları meydanda görə biləcəyik.

- Sami Mmaenin əvəzedici heyətə göndərilməsinin səbəbi nədir?

- İdman və intizam qaydalarını pozmuşdu, ona görə əvəzedici heyətə göndərdik. Bəzi detalları açıqlamağa ehtiyac yoxdur. Futbol karyeramızda, təcrübəmizdə belə olub.

- Toral Bayramovun “Nyukasl”la Bakıdakı matçda gülməsi çox müzakirə edildi. Onunla bağlı tədbir görüldü?

- Ola bilər ki, o epizoda kimi hansısa söhbət aparırdılar, gülməli vəziyyət yaranmışdı. Bəli, fikirlərimi bildirdim. Hansısa xırdalıqlara getməyə ehtiyac yoxdur. Kimə hansı qaydada iradlarımızı bildirmək lazımdırsa, yaxşı səviyyədə bildirilib.

- “Neftçi” ilə matç “Nyukasl”la oyunun fonunda yenidən gündəmə gəlib...

- İndi müzakirə olunası məsələ deyil. Bizim rəhbərlik adından “Neftçi”yə təşəkkür edildi. İkinci xahişimizdən sonra qərar verildi. “Neftçi”yə bir daha təşəkkür edirəm. Bizim qrafikimiz çox sıx idi. İstəyirdik ki, “Nyukasl”la oyuna yaxşı hazırlaşaq. Əsasən də, iki oyun arasında cəmi 2 gün vaxtımız var. Səfərdəki görüşü, yolu düşünərək bu addımı atdıq ki, futbolçular hamısı hazır olsunlar. Bizi başa düşmək lazımdır. Tək “Qarabağ” yox, başqası olsun, illərcə baş verib. Bu gün də bunun tərəfdarıyıq. Bizim hazırkı hazırlığımız onlarla yan-yana qoyulası deyil. “Nyukasl” illərdir bu rejimdə oynayır, uyğunlaşıb. Çox xırdalığa getsək, çox danışmaq olar. Müqayisəolunmazdır. İlin əvvəlindən deyirlər ki, pley-off matçlarında qarşı tərəf razı olarsa, oyun təxirə salınacaq.

“Neftçi” yox desəydi, yenə işimizi görəcəkdik, “sağ ol” deyəcəkdik. O qədər problemlərimiz var ki, bu, müzakirə olunası problem deyil. Biz bir-birimizə meydanda rəqibik. Amma “Neftçi” rəhbərliyi və ya digərləri ilə münasibət yaxşıdır, bir-birimizi daha tez və yaxşı anlamışıq. Çox da müzakirə olunası mövzu deyil. Təşəkkür edirəm ki, “Neftçi” buna razılıq verdi.

- Ayxan Abbasov mətbuat konfransında bildirdi ki, Qubadakı qapıların birinin ölçüsü digərindən 11 sm yüksəkdir. Bu haqda nə deyəcəksiniz?

– Ayxan maraqlı açıqlama verib. Mən meydançanı demişdim, Ayxan qapıları deyib (gülür). “No comment”, fikir bildirməyəcəm.

- Zədədən sonra Bəhlulun psixoloji durumu necədir?

- Yaxşı deyil, çox üzgündür. Tək Bəhlul yox, hamımız üzgünük. Amma zədə qaçılmazdır. O, yaxşı mövsüm keçirib, gözlənilən idi ki, hansısa məqamda futbolçu yorulur. Belə hallar olur.

- Növbəti mövsüm bu uğuru təkrarlamaq üçün hansı mövqelərə transferlər lazımdır? Çatışmazlıqlar hansı mövqelərdir?
- Hər mövqeyə baxış keçiririk. Transfer etmək istəyirik. Həm komandada oyunçunu sayını artırmaq, həm də keyfiyyəti yaxşılaşdırmaq istəyirik. Ən azından əldə etdiyimizi saxlamaq istəyiriksə, Premyer Liqada liderlər sırasında olmalıyıq.

- Düşünmək olar ki, “Nyukasl”ı keçmək real görünmədiyi üçün dərinlikdə daha çox “Sabah”la oyunu düşünürsüz?

- İnanın ki, fikrimdə “Nyukasl”la görüşdür. “Sabah”la oyun barədə düşünmürük. Böyük turnirdir. Reallığa baxsaq, oradakı matçda yaxşı nəticə əldə etməyimiz real görünmür. Amma biz bu turnirdən həzz almalıyıq, futbolçular bu turnirdə böyüyürlər, böyük məğlubiyyətlər həmişə idmançını möhkəm edir. Bu cür böyük komandalara qarşı belə tribunlarda oynamaq özü ayrıca məsuliyyətdir. Bu gün var İgitlərə Premyer Liqası və Avropa futbolu. Bu liqa digələrindən fərqlənir. İngiltərə klubları digərlərindən bir baş yuxarıdır. Onların hazırda futbola yönəldiyi məbləğlər, infrasturktur digərlərini üstələyir. Buna görə hara getdiyimizi bilirik. Burada uduzsaq da, futbolçularımdan cəsarət istəmişəm.

Biz mütləq cəsarətli olmalıyıq. Bugünkü uğura məğlub ola-ola, yıxıla-yıxıla gəlmişik, çəkinməmişik, qorxmamışıq. Bu da bəzən uğurlar əldə etməyə şərait yaradır. İndi fikrimiz “Nyukasl”la səfər görüşündədir. Oyunun gedişatına görə addımlar atacağıq. Bakıya döndükdən sonra çempionatı düşünmək üçün vaxtımız olacaq.

- “Qarabağ” bu mövsüm çox uğurlu çıxış etdi və tələblər artacaq. Bu haqda fikriniz necədir?

- Tamamilə doğrudur. Əgər bir insan, kollektiv müəyyən səviyyəyə qalxıbsa, ən asanıdır. Orada qalmaq çətindir. Bu oyunlarda hiss edirik ki, məsuliyyətimiz, tələblərimiz artır, gözləntilər çoxalır. Yaxşı qələbələrimiz oldu. Nəticələrə baxsaq, 10 xal əldə etdik. ÇL kimi böyük turnirdə 10 xal əldə etmək, böyük uğurdur. Hansısa oyunda uduzurduq, həmən neqativ fikirlər dolaşırdı. Biz gözləntiləri hiss edirdik. Qaçılmazdır. Buna görə futbol çox sevilir, dünyada yəqin ki, 1 nömrəli müzakirə mövzusu futboldur. Dayanamaq olmaz. Həmişə önə pozitiv baxmalıyıq ki, minimum əldə etdiyimizi qoruyub-saxlayaq.