TAQ. az xəbər verir ki, Türkiyə Azərbaycan Qardaşlıq İctimai Birliyinin Səbail rayon təşkilatının sədri Yeganə Qəhrəmanova və müavinləri Bakıda Şəhidlər Xiyabanında yerləşən Türk şəhidliyi abidəsini ziyarət edib. Ziyarət Türkiyə Azərbaycan arasında 14 yanvar 1992-ci ildən etibarən yaradılan diplomat münasibətlərin 30 illiyi ilə əlaqədar təşkil edilib. Məzar üzərinə gül dəstəsi düzülüb, türk şəhidlərin ruhuna dualar oxunub. Ardınca Şəhidlər Xiyabanı da ziyarət edilib.

Təşkilat tərəfindən iki qardaş ölkənin tarixi diplomatik münasibətlərinə dair geniş videoçarx da hazırlanıb. Həmin videoçarxda böyük lider Mustafa Kamal Atatürkün "Azərbaycanın sevinci bizim sevincimiz, kədəri bizim kədərimizdir", Heydər Əliyevin "Bir millət, iki dövlət" fəlsəfəsi ilə əsaslı təmələ sahib olan ölkələrimizin əlaqələrinin daha inkişaf etdirilməsi, müasir dövrdə Azərbaycanın etibarlı strateji tərəfdaşı olan Türkiyə ilə münasibətlərinin möhkəmləndirilib daha da genişləndirilməsi, Azərbaycan dövlətinin xarici siyasətinin çox mühüm tərkib hissəsi olması və tarixi köklərə və qardaşlığa söykənən, hər zaman həmrəylik nümayiş etdirən Azərbaycan və Türkiyə arasında əlaqələr siyasi, iqtisadi-ticari, humanitar, hərbi və s. bütün sahələrdə çox uğurla inkişaf etməsi qeyd olunur. Həmçinin videoçarxda iki dövlətin rəhbərlərinin müntəzəm xarakter almış qarşılıqlı səfərləri ölkələrimiz arasında bütün sahələrdə əməkdaşlığın inkişafında əhəmiyyətli rol oynamasından, müsbət nəticələr verməsindən və 2020-ci ilin 44 günlük Vətən Savaşında da bu birliyin öz parlaq səhifəsini yaşamasından da bəhs olunur.
Qeyd edək ki, Türkiyə 9 noyabr 1991-ci ildə Azərbaycanın müstəqilliyini tanıyan ilk dövlətdir. Azərbaycanın Türkiyədə səfirliyi 1992-ci ilin avqust ayında açılıb. 1993-cü ilin yanvar ayında İstanbul şəhərində, 12 aprel 2004-cü il tarixində isə Qars şəhərində Azərbaycanın Baş konsulluqları təsis edilib. Türkiyənin Bakıda Səfirliyi Naxçıvan və Gəncə şəhərlərində isə Baş Konsulluqları fəaliyyət göstərməkdədir.

Günel İsayeva