Taq.az xəbər verir ki, 20 Yanvar faciəsinin 32 - ci ildönümü ilə əlaqədar Türkiyə Azərbaycan Qardaşlıq İctimai Birliyinin və TAQ. az saytının kollektivi ümümxalq ziyarətinə qoşulub. Şəhidlər Xiyabanında məzarlar üzərinə gül dəstələri qoyulduqdan sonra İctimai Birlik nümayəndələri müstəqilliyimizin bərpası uğrunda mücadilə verən şəhidlərimizin əziz xatirəsini bir dəqiqəlik sükutla yad ediblər.
Ardınca 20 Yanvar faciəsi ilə əlaqədar Birliyin sədr müavini Səkinə Bayramova, Bakı şəhəri üzrə təşkilat sədri Günəş Quliyeva dövlət televiziyası kanalına (AzTV) , TAQ. az sayt əməkdaşı Günel İsayeva isə "CBC" kanalına müsahibə verib. Həmin çıxışlarda 1990-cı il yanvarın 19-dan 20-nə keçən gecə, saat 23:30-da Bakı şəhərinə keçmiş Sovet İttifaqının qoşun hissələri tərəfindən fövqəladə vəziyyət elan edilmədən yeridilməsi və dinc əhaliyə divan tutulması faktına əsasən birlik nümayəndələri öz fikirlərini bölüşüb, qanlı olay nəticəsində insanların qətlə yetirilməsi, yaralanması və itkin düşməsi faktı pislənilib.
Birlik nümayəndələri fikirlərini TAQ. az saytı ilə də bölüşüb. Birliyin sədri Kənan Adıgözəlov xalqın bütövlüyü naminə ziyarətləri mənəvi borc hesab edərək tarixi qələbələri ilə xalqın əzəmətinin var olduğunu qeyd etdi.
" Bü günün tarixi və mənəvi əhəmiyyəti bizim üçün dəyərlidir. Bizi xalq olaraq qorxutmaq, məhv etmək istəsələr də məhz bu şəhidlərin hesabına, mərd, igid, milli kimliyi, əzmi naminə özünü əliyalın vəziyyətdə tankların üstünə atan oğul və qızların sayəsində müstəqilik, varıq"

Birliyin sədr müavini Səkinə Bayramova tarixin bu gününü hüzn günü ilə yanaşı, əzəmətli gün kimi hesab edir.
"Bu vüqar, əzəmət ondan ibarətdir ki, Azərbaycan xalqı bu tarixi günü və bu gündə verdiyi şəhidləri ilə tanıtdı. Onlar azadlıq toxumunu səpdilər. Bu günki azadlığımızın ilk çarçıları, ilk təməlqoyanları onlar oldu. 20 Yanvar şəhidləri xalqın milli kimliyini unutdurmağa qoymur, bugünki müstəqilliyimizə gələn yolun ilk qəhrəmanlarıdır. Onları unutmağa haqqımız yox. Hər zaman yad etmək borcumuzdur"
TAQ İB-nin Bakı şəhəri üzrə sədri Günəş Quliyeva isə gənclərin bu tarixi anı unutmamasının önəmindən bəhs etdi.
"Gənclər gələcəyimizdir. Onlar hər zaman tarixi faktları və həqiqətləri bilməlidir. Xalqın azadlığı uğrunda şəhid olan heç bir qəhrəman diqqətdən kənarda qalmamalı. Həqiqətən xalq olaraq biz bu günü heç bir zaman unuda bilmərik. 20 Yanvar qan yaddaşımızdır"
Digər çıxışçılar da xalq arasında mübarizə əzminin gücləndirilməsini və hər zaman tarixi həqiqətləri diqqətə çatdırmağı, təhrif etməməyi diqqətə çatdırdılar.

Qeyd edək ki, Sovet Ordusu qoşunlarının qanunsuz yeridilməsi nəticəsində Bakıda və Azərbaycan rayonlarında 146 nəfər öldürülür, 744 nəfər yaralanır, 841 nəfər qanunsuz həbs oluur. Hərbi qulluqçular tərəfindən 200 ev və mənzil, 80 avtomaşın, o cümlədən təcili yardım maşınları, yandırıcı güllələrin törətdiyi yanğın nəticəsində dövlət əmlakı və şəxsi əmlakı məhv edilir. Həlak olanların arasında qadınlar, uşaqlar və qocalar, həmçinin təcili yardım işçiləri və milislər olur. Öncədən hazırlanan bu təcavüzkarlıq aksiyası Azərbaycan xalqının demokratiya və milli azadlıq uğrunda mübarizəsini boğmaq, xalqı təhqir edərək ona mənəvi zərbə vurmaq məqsədi daşısa da, həm də bir xalqın dirənişinin göstəricisidir.
Sonda şəhidlərin ruhuna dualar oxunub, xatirə şəkli çəkdirilib.

Günel İsayeva