TAQ. az xəbər verir ki, Qarabağın dirçəliş proqramında yaxından iştirak etmək istəyən və “Ağıllı şəhər” konsepsiyasına dair innovativ layihələri olan tələbələr, startaplar və sahibkarlar üçün “TEKNOFEST” Aerokosmik və Texnologiya Festivalı çərçivəsində unikal təqdimat imkanı yaradılır.

“TEKNOFEST” Azərbaycan Respublikası Rəqəmsal İnkişaf və Nəqliyyat Nazirliyinin təşkilatçılığı ilə bu ilin 26 – 29 may tarixlərində Bakıda ilk dəfə olaraq keçiriləcək. Beynəlxalq brendə çevrilən “TEKNOFEST”in keçirilməsində əsas məqsəd aviasiya, kosmik sənaye və rəqəmsal iqtisadiyyat kimi sahələrin gənclər arasında təbliği, bu sahələrdə sahibkarlığın təşviq edilməsi, festival çərçivəsində təşkil olunan yarışlar vasitəsilə gənc mühəndislərin bilik və bacarıqlarının üzə çıxarılması, eləcə də milli texnologiyaların geniş ictimaiyyətə təqdim olunmasıdır.

Bakıda keçiriləcək festivalın ən maraqlı yarışlarından biri də “Smart Qarabağ” Hakatonudur.

“Əşyaların interneti”, bulud texnologiyaları, süni zəka, maşın öyrənməsi və digər aparıcı texnologiyaları özündə cəmləşdirən “Ağıllı şəhər” konsepsiyası üzrə keçiriləcək “Smart Qarabağ” Hakatonuna qeydiyyat artıq başlayıb. Hakaton təhsil, kənd təsərrüfatı, nəqliyyat, ev təsərrüfatı, enerji sərfiyyatı, su sərfiyyatı, ətraf mühit və təhlükəsizlik sahələrini əhatə edir.

Bu müsabiqə çərçivəsində müxtəlif proqram təminatlarından, istifadəçi interfeyslərindən və kommunikasiya şəbəkəsindən istifadə edilərək “Əşyaların interneti (IoT)” texnologiyası vasitəsilə əhaliyə müxtəlif sahələrdə innovativ həllər təklif edilir.

“Smart Qarabağ” Hakatonunda müvafiq sahələr üzrə ən səmərəli həll yolları təqdim edən gənclər üçün mükafat fondu nəzərdə tutulub. Mükafat fondu I yer üzrə 10.000 ABŞ dolları, II yer üzrə 5000 ABŞ dolları və III yer üzrə isə 3000 ABŞ dolları təşkil edir.

Qeyd edək ki, Gənclərimizin işğaldan azad olunmuş ərazilərin bərpasına töhfə verəcək “Smart Qarabağ” Hakatonu kimi intellektual müsabiqədə iştirakı olduqca vacib və dəyərlidir.

Hakatonda iştirak etmək üçün son müraciət tarixi 16 mart 2022-ci ildir.