2 İyul Azərbaycan Polisi Günüdür. Vətəndaşlarımızın asayişinin, daxili təhlükəsizliyin və cəmiyyətin qanuni mənafelərinin keşiyində duran daxili işlər orqanları bu peşə bayramını da mübariz əzmkarlıq, böyük ruh yüksəkliyi və yüksək inam hissi ilə, həmçinin xidmətdə əldə etdikləri müsbət nəticələrlə qarşılayırlar. Azərbaycan Respublikasının dinamik inkişafında polis orqanları fəal rol oynayırlar.

Şübhəsiz ki, hər bir peşənin bir-birindən fərqli xüsusiyyətləri, üstünlükləri və çətinlikləri var. Müəllim mənəviyyatın, həkim sağlamlığın, hakim ədalətin keşiyini çəkir, lakin bu çətin və şərəfli peşələrdən biri də polis peşəsidir, ona görə ki, polisin xidməti çətinliyi və məsuliyyəti ilə seçilir. Polis ictimai təhlükəsizliyin və qanunçuluğun keşiyini çəkir, eyni zamanda cinayətkarlığa qarşı gecə-gündüz mübarizə aparır.

İnsan neçə gün yuxusuz qala bilər, neçə həftə istirahətsiz işləyə bilər?. Amma polis bu yuxusuz gecələri və istirahətsiz həftələri xidməti vəzifə öhdəliyi hesab edir, xalqa və qanuna məsuliyyətlə xidmət edir. Elə bu səbəbdəndir ki, polis işində istirahət anlayışı yoxdur. Məsələn, bütün bayram günlərində vətəndaşlarımız müəyyən qədər istirahət edir, polis əməkdaşları isə gücləndirilmiş iş rejimində işləyir. Ümumiyyətlə polis əməkdaşları bütün günü təhlükəsizliyin keşiyində dayanır, başqasının malını, mülkünü, ailəsini qorumaq üçün, hətta onlar öz qanını, canını, əsirgəmədən, hər cür təhlükənin üzərinə gedərək öz peşə vəzifələrini yerinə yetirirlər. Buna görə də həftə ərzində 7 gün, gün ərzində 24 saat təhlükəsiz yaşamaq istəyən hər bir insan polisə etibar edir və bu etibar hörmət və inamla şərtlənir. Bu prinsiplər, polis-vətəndaş münasibətləri üzərində köklənir. Məlumdur ki, bütün dünyada polis çətin şəraitdə işləyir. Uzaqdan hər şey çox gözəl və rahat görünə bilər. Lakin, heç də hər şey göründüyü kimi deyil. Çünki polis qanunların və insan haqlarının qorunmasına bütövlükdə cəmiyyətin qorunmasına xidmət edir. Eyni zamanda, hər bir insanın həyatında kifayət qədər çətin anlar olur. Bu, təbiidir. Həyatın elə çağları, məqamları, hətta anları var ki, onlar insanın daxilində mənəvi bir öhdəlik yaradır. Ancaq, polisin həyatı və xidməti elə bu cür anlardan ibarətdir və bəzən bu, onun həyatı bahasına başa gəlir.

Polislər günün istisində, yağışda, qarda, küləkdə, dumanda bir sözlə hava şəraitinin yaratdığı narahatlıqlara heç bir məhəl qoymadan küçələrdə ictimai asayişi qoruyaraq öz vəzifə borclarını sədaqətlə yerinə yetirirlər. Hətta Karantin dövründə həkimlərlə yanaşı, polislərin də işi çox çətin idi. Ona görə ki, onları əhalinin ən həssas təbəqəsinə zəruri ərzağın, hətta ağır xəstələrə tibbi ləvazimatların, dərmanların çatdırılmasında ön sıralarda gördük. Koronavirus pandemiyası ilə bağlı maarifləndirmə işlərində də polislərimizin fəaliyyəti əvəzsiz oldu. Həmin vaxtlarda cəsarətli tibb işçilərimiz, könüllü gənclərimiz, əzmkar hərbi qulluqçularımızla yanaşı, polis əməkdaşları da fəaliyyətləri, nümunəvi davranışları ilə soydaşlarımızın təhlükəsizliyi keşiyində çox məğrur və ayıq-sayıq dayandılar. İnsanların sağlamlığının qorunması, Vətənimizin təhlükəsizliyi naminə hər kəsin bir olduğu, yenilməzlik nümayiş etdirdiyi zamanda Azərbaycan polisi çox böyük fədakarlıq nümayiş etdirdi. Baxmayaraq ki, onlar hər an koronavirusa yoluxma təhlükəsi ilə üz-üzə qalırdılar, lakin onlar əsl şərəfli peşə sahibləri olduqları üçün çox ciddi rejimdə tapşırıqlarının öhdəsindən layiqincə gəldilər. Hər zaman olduğu kimi onlar bu ağır, çətin günlərdə həyatlarını təhlükəyə ataraq, daim vətəndaşların təhlükəsizliyinin keşiyində dayandılar. Hər zaman yolda qalanın, yardıma ehtiyacı olanın, xəstə insanların ilk köməyinə çatan polislərimiz olur. Polislər öz canlarından da üstün xalqı tuturlar. Çünki vəziyyət hər nə olursa olsun onlar daim asayişin keşiyində dururlar. Hamı kimi ailəsi ilə vaxt keçirmək əvəzinə gecəsini gündüzünə qatıb, özlərini bir an belə olsun düşünmədən ictimai asayişi qoruyan da Azərbaycan polisləridir. Məhz ən çox riskə məruz qalan da polislər olur. Ümummilli liderimiz Heydər Əliyevin də dediyi kimi: “Polis peşəsi ağır peşədir. O, bir tərəfdən cəsarət, şəxsi mətanət, ikinci tərəfdən bilik, dərrakə, elm, təhsil, təcrübə tələb edir”. Məhz ümummilli liderin məqsədyönlü siyasəti, hüquq-mühafizə orqanlarına diqqət və qayğısı nəticəsində, polis müstəqil Azərbaycanın dövlətçlik tarixində sabitliyin, ictimai rifah və ictimai təhlükəsizliyin qarantına çevrildi. Bu siyasətin möhtərəm Prezident İlham Əliyev tərəfindən çox böyük uğurla və yaradıcılıqla davam etdirilməsi nəticəsində, Azərbaycan ictimai təhlükəsizliyin etibarlı qorunduğu və kriminal durumun nəzarət altında olduğu ölkələri sırasına daxil oldu. Hətta, cinayətkarlıqla mübarizənin nəticələrinə görə, ölkəmiz bəzi Şərqi Avropa, Amerika ölkələrini də qabaqlayır. Bu, birbaşa ictimai maraqlara söykənən sosial sifarişdir və məqsədyönlü dövlət siyasətinin nəticəsidir. Bu nəticələrin qorunması və saxlanması cəmiyyətdə qanunçuluğun və ictimai təhlükəsizliyin qorunmasına cavabdeh olan hər bir polis əməkdaşından çeviklik, bilik, qabiliyyət və fədakarlıq tələb edir. Fəlsəfədə deyilir ki, fədakarlıq, insan kamilliyinə doğru aparan yoldur. Deməli, polis həm də kamil olmalıdır, xidmətinə qanun çərçivəsində və həmçinin yaradıcı yanaşmağı bacarmalıdır. Azərbaycan polisi də öz xidmətinə bu cür yanaşır, nəticələr də göz qabağındadır.

Onu da qeyd etmək lazımdır ki, ölkəmizdə vətəndaşların təhlükəsizliyinin təmin edilməsi istiqamətində görülən işləri beynəlxalq təşkilatlar, dünya dövlətləri də yüksək dəyərləndirir. Buna görə də, bu gün Azərbaycan çoxsaylı beynəlxalq tədbirlərə, forumlara, konfranslara ev sahibliyi etməklə, dünyada tolerantlıq məkanı, dözümlülük, multikulturalizm mərkəzi kimi tanınır. Təbii ki, bu uğurların arxasında çətin və şərəfli xidmət aparan bütün hüquq-mühafizə orqanları ilə yanaşı Azərbaycan polisi də dayanır.

Çətin və şərəfli peşə sahibi olan Azərbaycan polisləri peşə bayramınız mübarək!