Başına yüz minlik rubl qoyulan və milliyyəti deyil, Vətəni seçən Milli Qəhrəmanımız
Qəhrəmanlıq milliyətcə ölçülmür, Vətənə xidmətdə bilinir.
Azərbaycanın Milli Qəhrəmanlarından biri, cəsur, qorxmaz Vətən oğlu olub. Milliyətcə rus olsa da, əsl azərbaycanlı, əsl vətənpərvər idi, Yuriy Kovalyov.
Yuri Kovolyov 29 may 1965 - ci ildə Göyçay rayonunda anadan olub. Sadə, mədəni bir ailədə.
Yeddi yaşında ailəliklə Rusiyanın Krasnodar vilayətinə köçür, beş ildən sonra isə yenidən Bakıya qayıdır ailəsi ilə birlikdə. O, orta təhsillə yanaşı, idmana da böyük maraq göstərir.
O, 11 yaşında olarkən idman ustası və Azərbaycanın Əməkdar məşqçisi Ravil Cəlilovun rəhbərliyi ilə futbol məktəbinin ixtisaslaşdırılmış sinfində sevdiyi idman növünün sirlərinə yiyələnir. Hələ futbol məktəbində oxuyarkən bacarıqlı qapıçı kimi formalaşan Yuriy öz çevikliyi ilə yoldaşları arasında fərqlənməyi bacarır.
О, iki dəfə Bakı çempionu, Respublika və Ümumittifaq turnirlərində Bakının gənclərdən ibarət yığma komandasının qapıçısı olur.
1981 - ci ildə Bakının Nizami rayonundakı 229 nömrəli orta məktəbi bitirir. Bir ilə kimi Azərittifaqın reklam istehsalat kombinatında çalışır.1983-cü ildə Pribaltika hərbi dairəsinin sıralarına çağırılmış, hava desant qoşunlarında xidmət edir və 1985-ci ildə ordudan tərxis olunur.1987-ci ildə Bakı Qırmızı bayraqlı Qara Dəniz Hərbi Donanmasının 109 saylı Miçmanlar və Praporşiklər məktəbinə daxil olur Yuriy.
O, 1990-ci il sentyabr ayının 15-də Daxili İşlər Nazirliyinin Xüsusi təyinatlı Polis Dəstəsinə qəbul edilir, Azərbaycanın bir çox döyüş bölgələrində mərdliklə vuruşur. Kovalyov Goranboy rayonunun kəndlərinin azad edilməsində böyük şücaət göstərir. Düşmən tərəfindən " Əsədovun bandası " adlandırılan XTMD-nin əməkdaşları ilə düşmənin rahatlığını əlindən alır. Düşmən snayperləri onu dağlar, daşlar arasında da axtarırdı. Başına yüz min rubl qiymət qoyulur. General Məhəmməd Əsədovun və nazir müavini polkovnik Ramiz Məmmədovun Yuriy Kovalyova böyük rəğbəti var idi və Kovalyov onları tez-tez müşayiət edirdi.
1991-ci ilin aprel ayında döyüş zonalarında fərqlənmiş bir qrup OMON-çunu mükafatlandırmaq üçün Daxili İşlər nazirinin müavini Rəhim Quliyev və Nazirliyin şöbə rəisi Həmid Cəfərov XTMD-yə gəlir. Mərasimdə çıxış edən Həmid Cəfərov 1991-ci il aprel ayının 3-də Respublikanın xalq deputatlarından Aydın Məmmədovun, Tamerlan Qarayevin, Ramiz Fətəliyevin və bir sıra rəsmi şəxslərin və özünün helikopter qəzasına uğramalarından söhbət açaraq helikopterdəkilərin xilas olmasında Yuriy Kovalyovun yüksək peşə səriştələrinin nümayiş etdirilməsini xüsusilə qeyd edir. Söhbət zamanı Yuriy ünvanına deyilən təriflər qarşısında təvazökarcasına susdu və sonra qeyd etdi ki,
"mən də Azərbaycanlıyam, bu torpağın çörəyini yemişəmsə, suyunu içmişəmsə, ona da xidmət etməliyəm".
Onun rus olması xarici jurnalistləri təəccübləndirir. Yuriy Kovalyov Şuşanın Qaladərəsi kəndində Azərbaycan jurnalistlərini müşayiət edərkən gözlənilmədən ora Ermənistan helikopteri enmiş və helikopterdəki xarici müxbirlər onunla görüşmək istəyir. Xarici jurnalistlər Kovolyovu suala tutulur:
- Siz russunuzmu?
- Bəli, mən rusam, Azərbaycan isə vətənimdir!
1991-ci il sentyabrın 13-ü Yuriy Kovalyov Bakıdan çıxır, həlak olduğu gündən 2 gün əvvəl sonuncu dəfə evə zəng vurur, hal - əhval tutur
1991-ci il 3 oktyabrda digər OMON-çu dostları Sergey Barınin, Andrey Kudenin, Aleksandr Abramovla birlikdə Ağdam ərazisində Xocavənddən növbəti tapşırıqdan qayıdanda içində olduqları UAZ-ı ermənilər atəşə tuturlar. Yuriy Kovalyov həlak olur, Kudenin isə ağır yaralanır. Ermənilər UAZ-a yaxınlaşanda partlayış baş verir. Ölüm ayağında belə bir neçə düşməni məhv edir. O, Bakı şəhərində Şəhidlər xiyabanında dəfn edilir.
Yuriy Kovalyov Tamara xanım ilə ailə həyatı qurmuş və ömrünün sonuna qədər onunla evli idi. Regina və Yulia adlı qızları bu evlilikdən yadigar qalır.
Bakı şəhərindəki 229 nömrəli orta məktəb onun adını daşıyır. Hazırda onun 2 nəvəsi və qardaşının övladları o məktəbdə təhsil alırlar.
Azərbaycan Respublikası Prezidentinin 6 iyun 1992 - ci il tarixli 831 saylı fərmanı ilə Yuriy Kovalyov ölümündən sonra Azərbaycanın Milli Qəhrəmanı adına layiq görülür.
Yuriy Kovalyov xalqımızın qan yaddaşında daim yaşayacaqdır!
2021 - ci ilin oktyabr ayının əvvəllərində Bakı şəhərinin Nizami rayonunda, Yuriy Kovolyovun oxuduğu 229 nömrəli məktəbin həyətində Milli Qəhrəmana diqqət əlaməti olaraq onun büstü qoyulub.
Ruhun şad olsun Yuri! Sən bu Vətənin mərd, cəsur və qəhrəman oğullarından biri kimi həmişə yaddaşlarda qalacaq oğullardansan!
Vətən bölünməz,şəhidlər ölməz!
XXX
Adını daşıyan məktəbə sənin,
Yüzlərlə qız gəlir, oğlanlar gəlir.
Qeyrətli oğlusan gözəl vətənin,
Məktəbin önündə büstün yüksəlir.
XXX
Suvardın qanınla ana torpağı,
İgidlik körpüsü qurdun sən,Yuri .
Sevdin doğma yurdda gülü - yarpağı,
Yerin aramızda görünür, Yuri.
XXX
Sən ki ölməmisən, aramızdasan,
Vətənim fəxr ilə çəkir adını.
Ey igid, hər zaman sıramızdasan,
Tanıdı millətim doğma - yadını !
ABİL İSLAM
Şair - Jurnalist
Prezident təqaüdçüsü,
TAQ.az saytının Baş redaktoru
(Fotolar müəllifindir)
Adını daşıyan məktəbə sənin,
Yüzlərlə qız gəlir, oğlanlar gəlir.
Qeyrətli oğlusan gözəl vətənin,
Məktəbin önündə büstün yüksəlir.
XXX
Suvardın qanınla ana torpağı,
İgidlik körpüsü qurdun sən,Yuri .
Sevdin doğma yurdda gülü - yarpağı,
Yerin aramızda görünür, Yuri.
XXX
Sən ki ölməmisən, aramızdasan,
Vətənim fəxr ilə çəkir adını.
Ey igid, hər zaman sıramızdasan,
Tanıdı millətim doğma - yadını !
ABİL İSLAM
Şair - Jurnalist
Prezident təqaüdçüsü,
TAQ.az saytının Baş redaktoru
(Fotolar müəllifindir)
