TAQ.az saytı xəbər verir ki, görüş Bakı şəhəri 329 nömrəli tam orta məktəbdə keçirilib. Tədbirdə Vətən Savaşının igid qaziləri, məktəblilər, məktəb kollektivi və Türkiyə Azərbaycan Qardaşlıq İctimai Birliyinin Səbail rayonu sədrinin elm və təhsil üzrə müavini Əzizə Abbasova iştirak edib. Tədbirdə qazilərdən Kənan Kərimli, Amin Musayev, Səlahəddin Mirzəliyev və gənc yaşda "Vətən Müharibəsi Qəhrəmanı" adını almış Vüsal Yaqubov keçdiyi şərəfli döyüş yolundan və Vətənə olan sevgilərindən bəhs edib. Məktəblilər qazilərə onları maraqlandıran suallar ünvanlayıb, Vətən oğullarına xidməti fəaliyyətlərinə görə təşəkkür ediblər. Məktəb rəhbərliyi və İctimai Birlik nümayəndəsi məktəblilərə vətənpərvər ruhda böyüməyin vacibliyini xüsusilə qeyd ediblər.
Sonda tədbir məktəbin "Xor" qrupunun ifasının müşaiəti ilə başa çatıb.

Günel İsayeva