TAQ. az xəbər verir ki, Türkiyə Azərbaycan Qardaşlıq İctimai Birliyinin əməkdaşları ilə Türkiyədə təhsil alan "Turan Dərnəyi" birliyinin türkiyəli tələbələri ilə birlikdə onlayn görüşü keçirilib. Zoom proqramı ilə təşkil olunan görüşdə Türkiyə Azərbaycan Qardaşlıq İctimai Birliyinin Bakı şəhəri üzrə sədri Günəş Quliyeva, birliyin Saatlı rayon üzrə sədri Bikə Allahverdiyeva, Naxçıvan Mədəniyyət Mərkəzinin direktoru Səyyar Bayat və Türkiyədə təhsil alan türkdilli tələbələr iştirak edib. Hər üç çıxışçı pedaqoq, türk sevdalısı olaraq fikirlərini gənc tələbələrlə bölüşüb. 20 Yanvar ümumxalq hüzn günü ilə əlaqədar düzənlənən görüşdə həmin günün tarixi, mənəvi əhəmiyyəti ilə yanaşı, Azərbaycan xalqının azadlığı, milli kimliyinə sahib çıxması və müstəqilliyi uğrunda verdiyi mübarizə əzmindən bəhs edilib. Qanlı 20 Yanvar tarixi qətlə yetirilən, yaralanan əliyalın insanların mübarizə əzminin əslində bir xalqın milli oyanışı, öz soyuna, türk kimliyinə sahib çıxması kimi qiymətləndirilib. Ümumilikdə çıxış edənlər türk ruhuna, soyuna, tarixinə, dəyərlərinə bağlılığın türk xalqlarının birliyinə aparan yolda bir təməl, bünövrə olduğunu gənclərin diqqətinə çatdırıb, onları türk xalqlarının zaman-zaman başına gətirilən müsibətlərdən, faciə və tarixi həqiqətlərdən məlumatlandırıblar. Təhsil, innovativ yeniliklərə açıq olduğu qədər türk kimliyinə və soyuna sahib çıxmağı bacaran türkdilli tələbələr də təcrübəli pedaqoqların çıxışını dinləyərək türk xalqlarının tarixi və birliyi naminə görülməsi vacib işlər barədə öz fikir və mülahizələrini bölüşüblər. Onlar da tarixi həqiqətlərin təhrif edilməsi və məqsədli şəkildə türk birliyinə mane olan qüvvələr barədə müzakirələr edib, öz təklif və gələcək planları barədə fikir mübadiləsi aparıblar.
Sonda dərnək üzvləri türk birliyi, inkişafı naminə görüşlərin daimi və birgə işbirliyin daha mütəşəkkil formada davam etdirilməsi qənaətinə gəliblər.
Qeyd edək ki, Türkiyə Azərbaycan Qardaşlıq İctimai Birliyi Türkiyədə əlaqələrin daha geniş və perspektivli qurulması istiqamətində işlərini davam etdirir.

Günel İsayeva