TAQ. az xəbər verir ki, Türkiyə Azərbaycan Qardaşlıq İctimai Birliyinin ilin son günü ilə əlaqədar yekun iclası keçirilib.
İctimai Birliyin sədr müavini və iclas moderatoru Səkinə Bayramova yeni il və Dünya Azərbaycanlılarının Həmrəyliyi Günü münasibətilə birlik əməkdaşlarını təbrik edib gələcək fəaliyyətlərində onlara uğurlar arzulayıb. Birliyin sədrləri və üzvləri də bayram təbriklərinə qoşularaq yeni ilin birlik naminə uğurlu olması üçün çalışacaqlarına söz veriblər.
Yekun iclasda İctimai Birliyin Səbail rayon üzrə sədri Yeganə Qəhrəmanova son iki gün ərzində Türkiyənin Qars universitetinin doktoru İlkin Ulusoyla danışıqlar apardığını və yanvarın 15-də keçirilən konfransda iştirak üçün birlik adına dəvət aldığını bildirdi. Türkiyənin Əskişəhər və Girəsun şəhərlərindən ikitərəfli əməkdaşlıq haqqında saziş bağlanması təklifinin gəldiyini də qeyd etdi. Həmçinin İsveçdə və Rusiyanın Rostov şəhərində yerli nümayəndəliklərin açılması istiqamətində aktiv danışıqların aparılmasını da əlavə edib.
TAQ İB - nin Saatlı rayon üzrə sədri Bikə Allahverdiyeva isə məlumat verdi ki, 31 dekabr tarixində müavinlər və üzvlərlə birlikdə rayonda ilk toplantı keçirilib və Şəhidlər Xiyabanı ziyarət olunub. Sədr həmçinin Türkiyənin Kayseri universitetinin professor, tələbə heyyəti ilə əməkdaşlıq haqqında ciddi danışıqlar aparıldığını da əlavə edib.
İctimai Birliyin Balakən rayon nümayəndəliyi isə rayonun Katex kəndində şəhid Yusif Azər oğlu Təmirovun adına bulaq açılışında iştirak etdiklərini və birliyin fəaliyyəti, məramı haqqında ictimaiətə geniş məlumat verdiklərini bildirdi.
Yekun iclasda həmçinin yeni təyinatlar da təqdim olundu. Şair, ziyalı Fəxrəddin Meydanlı Səbail rayon üzrə sədrinin iqtisadiyyat və maliyyə şöbəsi üzrə, ATU-nun 2-ci kurs tələbəsi Əli Məhərəmli isə gənclər və idman üzrə müavini təyin olundu.
Türkiyə Azərbaycan Qardaşlıq İctimai Birliyinin Ukrayna üzrə nümayəndəsi kimi Ceyhun Şüküroğlu seçildi.
Qeyd edək ki, Ceyhun Şüküroğlu uzun müddət Azərbaycan telekanallarında rejissor kimi çalışıb. Hazırda Ukraynada yaşayır və fəaliyyət göstərir.

Günel İsayeva