TAQ. az saytı xəbər verir ki, Türkiyə Azərbaycan Qardaşlıq İctimai Birliyinin uğurlu fəaliyyəti qısa zamanda ətrafına daha çox sayda əməkdaş cəmlənməsinə səbəb olub. Artıq birliyin 20-dən artıq Bakı şəhəri və regionlar üzrə sədrləri, onların müavinləri və çoxsaylı üzvləri var. Ən son keçirilən iclasda açıqlanıb ki, bu ilin dekabrından aktiv fəaliyyətə başlayan birliyin üzvləri yalnız ölkədə deyil, Türkiyədə və digər türkdilli xalqların kompakt şəkildə yaşadığı avropa ölkələrində də artmaqdadır. TAQ İB - nin Bakı şəhəri üzrə sədri Günəş Quliyeva və onun müavinləri saytımıza bildirdi ki, hər gün Bakı şəhərində əyani, onlayn şəkildə təbliğat-təşviqat prosesləri aparılır, aktiv, məhsuldar şəxslər əməkdaş, üzv olaraq seçilir, birliyin uğurlu fəaliyyətinə dair yeni planlar qurulur. Yeni ildən etibarən gənc sədr elm, ədəbiyyat və mədəniyyət sahəsində "ortaq türk mədəniyyəti, dili, folkloru, yaradıcılığı" mövzusunda araşdırmaların aparılmasını və bu istiqamətdə türk həmkarları ilə nəzərdə tutulan ortaq layihəyə tez başlanılmasını prioritet hesab edir.
"Türk dünyasının birliyi, tarixi, adət-ənənəsinin araşdırılması, ortaq dil, folklor, ədəbi nümunələrin tədqiqatı, ailədə, cəmiyyətdə qadın gücü, ana, Vətən, ailə, ocaq dəyərlərinin, kodekslərinin öyrənilməsi, türk geninin, fəlsəfəsinin mənimsənilməsi ən önəmli məsələlərdəndir ki, birliyimizin planlaşdırdığı əsas layihələrdən vacibi budur. Ortaq bir dərgidə, ya kitab şəklində çapı gözləniləndir"
Günəş Quliyeva Birliyin Bakı şəhəri üzrə ilk toplantısını dekabrın 29-da həm təbliğat işləri aparmaq, həm də birlik adına mənəvi dəstəyini göstərmək naminə "Nur" uşaq sığınacaq evində keçirməyi planlaşdırır.
Türkiyə Azərbaycan Qardaşlıq İctimai Birliyinin ən aktiv əməkdaşlarından olan Səbail Rayon üzrə sədr, filologiya elmlər doktoru Yeganə Qəhrəmanova ötən həftə ərzində Türkiyənin Alanya, Girəsun və Əskişəhər kimi şəhərlərində fəaliyyət göstərən Azərbaycan dərnəkləri ilə sıx əlaqələr qurulduğunu, əməkdaşlıq haqqında razılığa gəlindiyini qeyd edib. Türkiyə - Azərbaycan Dostluq Dərnəkləri Federasiyası ilə danışıqlar aparılıb ki, Türkiyənin digər şəhərlərində də İctimai Birliyin əməkdaşlığı formalaşsın, möhkəm əlaqələri yaransın. Həmçinin Səbail rayon sədri elm, mədəniyyət, ədəbiyyat və ortaq dil mövzularının da gündəmdə saxlanıldığını, daim iştirakçısı olduğu konfranslarda, tədbirlərdə birliyin adından geniş şəkildə müzakirələr etdiyini, yeni əlaqələr yaratdığını bildirib.
"Onu da əlavə edim ki, bu yaxınlarda Rusiyanın Tatarıstan Muxtar Respublikasının Kazan universitetinin professoru, filologiya fakultəsinin dekanı Alfiya Yusifova ilə bu barədə söhbətlər aparılıb, birliyin Tatarıstanda tanıtımı, təşəkkülü naminə razılığa gəlinib. Alfiya xanımı elmi işçi kimi hətta əvvəllər Azərbaycana konfranslarda iştirak üçün dəvət etmişik və iştirakı davamlı olacaq. İstəyirik ki, elm, ədəbiyyat, ortaq dil ənənələri baxımdan əlaqələr güclənsin, türkçilik, qardaşlıq istiqamətində sıx əməkdaşlıq yaransın"
Aktivliyi ilə seçilən Səbail rayon üzrə sədr müavini Xoşbəxt Məmmmədova isə daima şəhid ailələrini, qaziləri və kimsəsizləri diqqətdə saxladığını, "Türkaz" tv vasitəsi ilə onların problemlərinin həlli istiqamətində işlər aparıldığını bildirib.
TAQ İB-nin Suraxanı rayonu üzrə sədri Manaf İmanov Qazaxıstandan türk dostları ilə birgə hazırda birlik naminə danışıqlar aparılması və sıx əməkdaşlıq yaradılması barədə məlumat verib.
Birliyin Masallı, Saatlı, Füzuli, Ağdam, Balakən, Şamaxı, eləcə də Xəzər, Abşeron rayon sədrləri də son günlər daha çox yerləşdiyi regionda maarifləndirmə işləri apardığını, eləcə də birliyə sağlam təfəkkürlü üzvlər cəlb etdiyini əlavə edib.
Həftəlik onlayn iclasda Türkiyənin Kayseri və Qars şəhərlərindəki əməkdaşları olan Hakan Yılmaz və Mehmet Özdəmirin də işləri qeydə alınıb. Onlar da təbliğat, təşviqat, üzvlər cəlb etmə və iki dövlət arasında sıx əməkdaşlıq yaratmaq mövzusunda aktiv olduqlarını diqqətə çatdırıblar. Bildirilib ki, professor, tarixçi Hakan Yılmazın baş redaktoru olduğu "Akademik tarix və düşüncə" dərgisinin növbəti saylarından biri Türkiyə Azərbaycan Qardaşlıq İctimai Birliyin fəaliyyətinə həsr ediləcək. Bunula yanaşı, birliyin hazırda Türkiyə xətti ilə bir sıra Orta Asiya və Avropa ölkələrində türk toplumlar daxilində maarifləndirmə işləri reallaşdırılır. Mayda Trabzonda görüş planlaşdırılır.
TAQ İB - nin sədri Kənan Adıgözəlov TAQ. az saytına açıqlamasında bildirib ki, birliyin Türkiyə üzrə sənədlərinin təsdiqi, yeni ilin ilk ayında gözlənilir ki, bununla da təsdiqlənən nizamnamə əsasında birlik rəsmi fəaliyyətinə start verəcək.
Bundan sonra tanıtımın planlı və uyğun şəkildə həyata keçirilməsi başlıca meyar olaraq götürüləcək.
Qeyd edək ki, ötən iki ay ərzində TAQ İB həftə ərzində iki gün olmaqla onlayn iclas keçirir. İclas İctimai Birliyin sədr müavini filologiya elmlər doktoru Səkinə Bayramovanın moderatorluğu ilə baş tutur. Həftəlik görülən işlər və edilən təkliflər qeydə alınır, aktiv və passiv fəaliyyətə, eləcə də neqativ hallara dair konkret ölçülər götürülür.

Günel İsayeva