Türkiyə Azərbaycan Qardaşlıq İctimai Birliyi Vətən savaşı qazisinin ev probleminin həllinə nail olub.
Taq.az saytı məlumat verir ki, Türkiyə Azərbaycan İctimai Birliyinin Füzuli rayonu üzrə nümayəndəliyi bu xoş əmələ imza atıb.
Nümayəndəliyin sədri Sərhəd Qənbərli və onun müavinləri Füzuli rayonunda ötən ilin 44 günlük Vətən Savaşında iştirak edən on iki qazisi ilə görüş keçirib.
Görüş çərçivəsində TAQ İB-nin fəaliyyəti, məqsəd və nizamnamə maddələri ilə bağlı qazilərə məlumatlar verilib, torpaqların işğaldan azad olunması, müharibə iştirakçıların, şəhid və qazilərin 44 günlük savaşda etdiyi qəhrəmanlıqlardan da söhbət açılıb. Daha sonra İctimai Birlik sədri və müavinləri qazilərin problemlərini və qarşılaşdıqları çətinliklər barədə sorğu keçirərək onları ətraflı dinləyiblər. Daha sonra həmin problemlərin yerindəcə həllinə dair məqsədi ilə Füzuli rayon İcra Hakimiyyətinin başçısı Alı Alıyev ilə ikitərəfli görüş keçirilib. Bu görüş İctimai Birliyin Füzuli rayon üzrə nümayəndəliyinin vasitəsi ilə baş tutub. Görüşdə qazilərin iş və evlə bağlı problemləri, üzləşdiyi digər çətinlikləri icra başçısının diqqətinə çatdırılıb və onlara yardım edilməsi xahiş edilib. Ətraflı dinləmə və müzakirələrdən sonra qazilərin müraciətləri qeydə alınıb və həlli üçün addımlar atılacağına söz verilib. Qazilərdən evi olmayan Qəmbərov Üzeyir Lənkəran oğluna isə elə dərhal kömək olunub. Belə ki, Füzuli rayon Aranqala qəsəbəsində qaziyə ev tikintisi üçün tikinti materialları göndərilib. İnşaat materialları tam təhvil verildikdən sonra dərhal evin tikintisinə start veriləcək. Bu xoş missiya bir qazinin evlə təminatına edilən dövlət dəstəyi ilə yanaşı, TAQ İctimai Birlik fəaliyyətinin də bariz göstəricisidir.
Qeyd edək ki, Vətən Savaşında iştirak edən şəhid ailələrinin və qazilərin problemləri TAQ İB - in öncül nizamnamə öhdəliklərindəndir ki, daim onlarla bağlı görüşlər keçirir və anım tədbirlərində iştirak edərək öz yardımını əsirgəmir.
Günel İsayeva
Taq. az
